Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1378_1

<begin>
Dit sijn de kueren ende ordinantien ghemaect wesende bi den baliu proefstescepenen ende raet van der stede van Curtrike in baten ende in profite van der traperie ende van der ghemeenre stede van Curtrike ende in meersinghen van den andren kueren voren gheuseert wesende beghinnende ende ingaende dese vorseide ordinantse smaentaghes den xxvIe dach in apiil in iaer MCCC achte en seventich
</begin>
<main>
Eerst so es gheordineert dat negheen man sal moghen lakene vercopen ende borghen langher dan sesse weuken den coopman ende XIIII nacht daerna den oestelier omme sijn ghelt te haelne daermede dat hi payment doen sal den trapier ende waert so dat hiemen langher borechte dat ware up een iaer sijn traperie ende nemmermee berecht te sine van sinen ghelde ende daerna waert so dat de ostelier niet ghenouch ne dade iheghen den trapier binnen den XIIII nachten so soude de trapier commen an den deken ende vinders van der halle ende begheeren datt men hein leden berecht dade van haren ghelde de welke deken en vinders souden verbieden den ostelier sinen tooch ende alle sine cnapen toter tijt dat de trapier vernoucht ware van sinen ghelde Ende wanneer dat de trapier betaelt sal wesen so sal hi moeten commen an den deken of an vinders van der halle ende doen sinen heet dat hi betaelt es van sinen lakene ende daer na sal hi gaen an den cleerc om hem ute te doene
Item dat niemenne wie hi es trapier noch vaerwerre sullen moghen borghen te maercten sonder de osteliers van der stede van Curtrike die seker ghedaen sullen hebben de welke die de borechtocht hebben sullen al so verclaerst staet up de boete van vichtech ponte parisise al so ditken ende also menechvaert als ment bevonde
Item so es gheordineert dat negheen ostelier noch haerleder cnapen sullen moghen vercopen wulle botre no meede up de boete verscreven dats vichtech pont parisise
Voort dat alle sudersche wulle die commen sal binnen der stede van Curtrike omme trapieren of om vercopen dat men die wulle sal toghen den deken ende vinders van der halle om de wulle te waardeerne of soe werdech ware te trapierne ende wie hierof de contrarie dade dat ware up de boete van x pont parisise also dicken als ment bevint
Item soes gheordineert dat de deken en vinders van der halle mids der ghemeenre traperie sullen nemme eenen goeden man die de lakine scriven sal die men vercopen sal up de halle ende in jaer-maercten emmer of ende an te doene van den deken ende vinders vorscreven ende van der ghemeenre traperie van den welken lakenne die men vercopen sal de trapiers sullen gheven van elken lakene drie pene parisise daerof de cleerc sal hebben de tweedeel ende de deken ende vinders van der halle terdendeel Ende waert so dat de trapiers heeneghe lakins verloren te maercten dat daerof deken ende vinders van der halle midgaders den cleerc hem leden warant derof wesen souden
Van den welken vorscrevenne boeten deken ende vinders ghelooft sullen wesen bi haren eede
</main>
<end>
</end>