Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1411_1

<begin>
Dit zijn de sltatuuten ende ordonnancien ghemaect bij Janne van Ogierlande bailliu van Curtrijcke in voorledenen tijden ende bij proofsten ende scepenen der stede van Curtrijcke up de provisie ende bewaernesse vanden weezen ende van huerliederen goede die nu zijn ofte naermaels weesen zullen van allen den poorteren ende poortessen binnen der stede ende daar buuten
</begin>
<main>
1. Eerst dat alle de weesen die naermaels versterfven zullen van vadere ofte van moedere poortere oft poortesse zijnde van der voorseide stede van Curtrijcke goedt hebbende dat den vadere ofte moedere dier levende bleven zullen wesen ghehouden zijn de voorseide weesen in voochdien te doen stellene binnen achtentwintich daeghen ten lancxsten naer dat zij bestorfven zullen zijn up de boete van drie ponden par ende in vanghenesse te gaene ter discrecie van den weesheeren ende oversienres van den weezen ende ghevanghen blijvende tot an der tijt dat zij de voorseide weesen zullen hebben doen stellen in voochdien ende daer zij de vanghenesse niet en hilden dat waere up ghecorrigiert te zijne bij den heere proofsten endescepenen alsser toebehooren zoude
2. Item waert zo dat de voorseyde weezen gherochten te versterfvene van vadere ende van moedere beede eer zij in voochdien ghestelt zullen wesen twee de naerste ende souffisanste vrienden ende maghen van de weesen ofte up wien der weezen goedt zoude moghen versterfven wonachtich bin der stede ofte daer buten bin der casselrie ghehouden zullen zijn die in voochdien te doen stellene binnen 28 daeghen naer 't overlijden van vadere ofte van moedere elck up de boete van drie ponden parisize ende in vanghenesse te gaene inder manieren voorscreven
3. Item zo welcken tijden dat de voorseijde weesen vervoocht zullen zijn dat die voochden zullen verheffenen van de weesen versterfvenesse binnen den eersten veerthien daeghen naer dat de voorseijde weesen vervoocht zullen zijn ende waert zo dat de voorseijde voochden bin den veertien daeghen niet verheffenen en consten dat zij den bezittere ofte besitteghe ofte den ghonen wient annegaen zal zullen moghen stellen te wette binnen veerthiennachten daernaer eerst commende omme te deelene naer costume ende usaige van der stede elc van den voochden up de boete van drie ponden par ende voort in vanghenesse te gaene als boven
4. Item zo welcken tijden dat de voochden van weezen overe de weesen verdeelt zullen hebben zij bij vriendelicheden ofte anders bij wette dat zij commen zullen tot den weesheers ende oversienres metgaerders twee van den souffisansten maghen ende vrienden van de voorseijde weesen ten minsten ende bringhen al tgoedt dat de voorseijde weezen ghebuert es ende toebehoort zo waer dat gheleghen zij omme dat te teeckenen in den bouck van den weezen ende daertoe mede die namen ende toenamen van den voochdenvrienden ende maghen daer mede commen zullen ende dat binnen vichtien daeghen naer de verdeelinghe ghedaen ende waert dat de voorseide voochden danof in ghebreke waeren elc voocht up de boete van drie ponden paris ende voorts in vanghenesse te gaene als boven
5. Item waert alzo dat den weesen daernaer eenich goedt verstorfve van wien het waere dat de voochden over hemlieden danof oic zullen verheffenen bij vriendelicheden up dat zij connen binnen den eersten veertich daeghen naer dat hem verstorfven zal werden ende waert dat zij daer binnen niet verheffenen en consten dat zij den ghonen wient angaen zal ghehouden zullen wesen te wette te stellene binnen veerthien daeghen daernaer omme te deelene naer wetten costumen ende usaigen van der stede daer den deel behoort of ghehouden te zijne elc in de boete van drie ponden par ende voort in vanghenesse te gaene etc Ende als de voorseide voochden verdeelt zullen hebben eijst bij vriendelicheden ofte bij wette dat zij aldies ghelijcke commen zullen tot den weesheers ende oversienres van weesen metgaerders twee van den souffisantsten vrienden ende maghen van den voorseide weesen ten minsten ende bringhen dat goet overe omme te teeckenen in den bouck van weezen alzo daertoe behooren zal binnen vichtien daeghen naer de verdeelinghe ghedaen elcken van den voochden up de boete ende vanghenesse boven ghenarreert
6. Item zo welcken tijden dat de voochden van weezen der weesenghelt ofte catheillen moeten minderen omme de noot ende proffijt van den weezen dat zij danof consent zullen haelen an den bailliu van Curtrijcke an de proofsten ende an den ghemeenen hoop van scepenen die uppervoochden zijn van weesen ende van dien consente brieven nemen bezeghelt metten zeghels van proofsten ende schepenen Den welcken brief van consente de voochden bringhen zullen binnen den eersten veerthien daeghen daernaer voor de weesheers omme dien te doen teeckenen in den bouck van weezen ende tguendt dat danof ghedaen zal zijn up elcken voocht ghehouden te zijne in de boete van drie ponden par ende voort in vanghenesse te gaene
7. Item waert dat de voochden ijet van den weesen goede ende gronde vercoopen wilden omme den noot ende proffijct van den weesen dat zij daer af als dies ghelijcke consent zullen haelen an den bailliu proofsten ende scepenen an den ghemeenen hoop ende danof briefven nemen als boven ende alst vercocht zal wesen dat zij binnen veerthien daghen daernaer commen zullen ten voorseijden boucke van weesen metten brieven van consente omme dat te teeckenen ende wat het ghegolden heeft ende wat men met den ghelde doet ofte ghedaen heeft elcken voocht up de boete van drie ponden par ende voorts in vanghenesse te gaene
8. Item als eenighe weesen verweesen bin den voorseijden schependomme ofte daerbuten eijst van vadere ofte van moedere dat de ghone die lancxt leeft eist den vadere ofte de moedere de weesen houden zal tot ter tijt van haeren bejaerten of dat zij thueren goede ghedaen zullen wesen up de bate van huerlierderen goede weder wasdom anne es ofte verlies ende goeden souffissanten zekere doen voor scepenen van Curtricke den weesen de grootte van huerliederen goede up te legghene ten tijde van haeren bejaerten of als men se bij wette thuerliederen goede doen zal
9. Item als eenighe weesen verweesen van vaedere ende van moedere beede die zoo rijcke zijn dat men se jaerlix houden mach metter bate van huerliederen goede ende noch daer boven vlietens hebben dat de naerste vriendt ende maech van den voorseijden weezen houden mach zal moghen omme zulcke somme van penninghen als de weesheers ende oversieners van weezen proofsten ende scepenen van Curtrijcke ende den voochden redelic dincken zal ende van den surpluuse goeden ende souffissanten zekere doen jaerlix te betaelene den voochden van den voorseijden weesen ende al dies ghelijcke goeden zekere doen den weesen huerlieder grotte van goede up te legghene ten tijde van hueren bejaerten ofte als zij thuerlierderen goede ghedaen zullen wesen ende daert den naersten vriendt ende maech niet en ghelieft de voorseijde weesen te houdene vz°omme zulcke somme jaerlix thebbene als gheordonneert zal wesen bij den weesheers proofsten scepenen ende voochden ende zekere te doene alzo voorseijt es zo mach se daernaer de naerste houden descenderende van grade te grade tot den derden grade up dat hij den weesheers ende voochden daertoe souffissant ghenouch dinckt ofte anders zullen de voorseijde voochden bij rade ende advijse van de weesheers de voorseijde weezen doen houden te hueren meesten oirboire ende prouffijtte ende danof goeden souffissanten zekere doen ende rekeninghe
10 Item up dat eenighe weesen verweesen van vadere ende van moedere de welcke zo aerme waeren van goede dat men se up de bate niet redelicke houden en mochte naer huerlieder betaempte zo zullen de voochden der weesen goedt uutgheven moghen bij raede ende advijse van den weesheers te weeseghelde dats te wetene tpont grooten omme vierentwintich grooten sjaers goeden souffissanten lieden de welcke ghehouden zullen wesen danof bortocht te doene voor scepenen van Curtrijcke met poorters van der zelver stede den weleken zekere de voochden ghehouden zullen wesen overe te bringhene den weesheers ende te doen teeckenen int pampier van den weesen binnen veerthien daeghen naer dat liet ghevonden zal zijn
11. Item uutedien dat men dicwils ende menich waerf ghesien heeft dat de kinderen tusschen den vichtiene ende vijf en twintich jaeren zijn van den quaetsten bestiere ende regemente dat zij zijn teeweghen tijden van haeren levene es gheordonneert dat men gheen weesen uut voochdicn doen zal noch regement zal laeten hebben van huerlierderen goede van wat oude dat zij zijn het en zij dat den bailliu proofsten ende scepenen weesheers vrienden ende maghen dinckt dat de weesen vroet ghenouch zijn ende souffissant omme huerlierder goedt te regierene ende te bestierene Ende zo wie eenighe weesen aldus in voochdien wesende yet borchde ofte leende dat hij danof gheen inninghe hebben en zal up de weese ofte weesen up huerlierder goedt noch up huerlierder borghen maer zullen de schult houden an hem zelven ende oic waert zo dat eenich wie hij waere eenighe coopen ofte voorwaerden maecte waert coopende ofte vercoopende jeghens de weese ofte weesen al eer den tijdt dat zij wettelick te hueren goede ghedaen zullen wesen dat de coopen ende voorwaerden te nieuten zullen zijn ende bliven van gheender werden
12. Item dat de voochden van weesen ghehouden zullen wesen rekeninghe te doene van den weesen goede ende van den wasdomme eenswaerf siaers voor maghen ende vrienden van den weesen ende rekeninghe ghedaen wesende dat zij ghehouden zullen wesen eenswaerfven siaers te commene tot den weesheers als oversienres van den weesenen ende totten clercq metgaeders tween van den naersten ende souffisantsten vrienden ende maghen van den weesen ende hemlieden overe te bringhene den staet van der rekeninghe omme te teeckenen in den bouck van den weesen den wasdom ende al tgoendt dat daerin bebooren zal gheteeckent te zijne omme de bewaernesse van den weesen elck van den voochden up de boete van drie ponden par ende voort ter discrecie van den weesheers int voorseide vanghenesse te gaene ende daer te blivene zo boven gheseijt es
13. Item zo zullen de weesheers ende clercq van weesen hebben van elcker voochdie te teeckenen drie schell par van elcken overbringhene dat de voochden overbringhen zullen de weesen goet ofte de rekeninghe omme int pampier te teeckenen van elcken ponde grooten 12 d par ende dat zal zijn ten coste van den voorseide weesen
14. Item ende als eenich persoon weeseghelt ghenoemen heeft ende danof zekere ghedaen zo zullen de weesheers ende clerck hebben omme dien zekere te teeckenen drie grooten van elcken ponde grooten de welcke drie ponden betallen zal de ghone die tweese ghelt nemen zal ende niet de weesen ende waert dat de weesheers ofte clerck meer namen dan voorseyt es dat waere up achterhaelt te zijne van hueren eede
</main>
<end>
</end>