Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1464_1

<begin>
Allen den gonen die dese presenten lettren zullen zien oft hooren lesen proofste ende scepenen van deser stede van Curtrijcke saluut Doen te wetene
</begin>
<main>
dat up zekere handelinghe van ghedinghe gheweist tusschen Diederick Joyenover ende uter naeme van Gheervinne Joyen zinen zone over een zijde ende Rugger van den Hecke als dekene metghaders den ghezwooren van den ambochte van der vollerie van Curtrijcke over andere ghespruut uut causen van dat de voors Diederick zeide dat hij vrij vollere was ende dat de voors Gheervin zijn natuerlic zone was ende dat be dien de zelve Gheervin schuldich was bekent ende ghehouden tsine over vrij vollere weerdich ende moghende 't voors ambocht te doene Daer jeghen de voors dekene ende ghezwooren dadt weerende deden zegghen dat den voors Gheervine was ghewonnen binnen huwelick ende datter de zelve Diederic hadde ende won bi Cathelinen den wive van Jooss van den Helslande die men zeit de Clerc ende dat de zelve Gheervine 't goed van den zelven Jooss ghedeelt hadde ende dat also verre dat de voors Diederick hilt den voors Gheervinne over zinen zone zo moeste de zelve Gheervinne als ghewonnen in huwelike aventrone wesen ende bekent gheen poortere van Curtrijcke zijnde bi desen dat alle de aventroncken ende zonderlinghe de voors Gheervine schuldich waren also wel versteken t'sine van der vryheit van den ambocht van der vollerie van Curtrijcke dadt een vrij ende notable ambocht es ende zeere wel ghepriviligiert als zij zijn van der poorterie van den voors stede van Curtrijek
</main>
<end>
Ghewijst was up den zessentwintichsten dach van der maend van April in 't jaer duust vier hondert ende vier en 't sestich bij proofste ende scepenen van de voorn stede van Curtrijcke naer de kennesse ghedreghen bi den voors Diederick de voorn Gheervin Joye versteken van bekent t' sine vry ghebooren vollere ende van over zulc te ghebruucken der vrijheit van der voors ambocht van der vollerie van Curtrijcke Al twelke wij also recht wille warachtich zijnde bi disen onsen lettren de welcke wij in kennessen hebben doen zeghelen metten zeghele van zaken der voors stede den lesten dach van Oust in 't jaer Onsen Heere dunst CCCC ende vier en tsestich
</end>