Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1476_1

<begin>
</begin>
<main>
Uutedien dat diverssche inwonende voortijts ten versoucke van gheestelicke lieden hemlieden vercocht hebben huusen erfven ende erfvelicke renten gheleghen ende streckende binnen der stede ende schependommen van Curtrijcke contrarie der ordonnancie daerup ghemaect bij zaeligher gheduchten den voorderen van mijnen gheduchten heere ende ter quetse van der hoocheijt van mijnen gheduchten ende souverainen heere ende oick van zijnder stede van Curtrijcke daar inne dat zeer vele werlicke husen zijn ende daer met de werlicke hussen gheestelick bedieden zouden ende trecht van den thiende penninck deser stede te nieuten gaen So es bij heere ende wet willende hierrinne voorzien ende remedieren ghekuert ende gheordonneert dat van nu voort an elcken hem verdraeghe van te vercoopene heijmelic ofte openbaar ofte laeten hebben ofte ghebrucken erfvelic ofte bij pachte eenighe kercken cloosters capitelen Godtshuusen van wat ordene zij zijn hospitaelen disscheu noch hueren procureurs supposten ofte andere eenighe huusen erfven ofte erfvelieke renten gheleghen ende hem streckende binder stede ende schependomme van Curtrycke up de verbuerte van den zelven vercochten huusen erfven ende erfvelicke renten ende oick van vichtich ponden par vlaemscher munte ende oic mede up als den vercoopere bij justicien bedwonghen wert de nature ende maniere van der coopmanscepe bij eede te verclaerssene ende de contrarie ende tinbreken van den voorseide keure bevonden woorde up ghecorrigeert te zijne boven den voorseide verbuerten als meijneedich
</main>
<end>
Aldus ghekuert bij mijnen heere van Hallennes bailliu Willem de Corte Jan Robe proossten Ghildolf van Douvrij ende zijn medeghezellen schepenen van Curtrijcke ende uute gheroupen den 5en dach van Meye int jaer duust vier hondert zesse ende tseventich
</end>