Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1481_1

<begin>
</begin>
<main>
Item omme dieswille dat diewijlent ghebuert es ende gheschepen es noch te geschiedene dat poorters van der voorseijde stede hem vluchtich ende absenteren van der voorseijde stede ende casselrie van schulden ende betrecken hem teeneghen vrijen plaetsen ende voeren met hemlieden groot machtichgoedt zo dat zij wel ghestelt ende ghegoedt bliven twelcke compt ter grooter scade van den ghonen die hemlieden groot goet gheborcht hebben ende onredelick ende onghedooghelic es so es ghekuert bij den voornomden bailliu proofsten ende scepenen dat van nu voortanne zo wat poortere ofte poortesse die vluchtich bediet van schulden ende met hem voert ende doet voeren eenich goet het zij ghelt juweelen ofte anderen porcheelen van catheilicken goede die zal men bannen uut den lande ende graefschepe van Vlaendre up de galghe vichtich jaer als van dieften naer tbevindt
</main>
<end>
Aldus ghekuert smaendaechs den vichtiensten in Meye ao 81 ende uutgheroupen ter Cruce 21 in idem Bij enz
</end>