Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1509_1

<begin>
</begin>
<main>
Omme dieswille dat commen es ter kennesse van bailliu proofsten ende scepenen van der stede van Curtrycke ende oic by clachte ende doleance van den pachtere van den thiende penninck van de voorseide stede dat diverssche personen huusen ofte erfve hebbende binnen der zelver stede ende scependomme hemlieden vervoordert hebben ende daeghelicx vervoorderen de zelve huerlieder huusen ende erfven ofte splete van dien daerof by indicien van eenighe personen bedectelic hemlieden te ontmaeckene ten behouve van anderen ofte van gheestelicken Godshuusen daermede de voornomde stede grootelicx verminderende in alle zaecken contrarie den ghemeenen oirboir ende omme daerinne te voorsiene so es by bailliu proofsten scepenen ende raden der zelver stede ghekuert ende gheordonneert by maniere van edicte dat niemant wie hy zy ghehuust ofte gheerft wesen binnen den scependomme van Curtrycke achtervolghende doude ordonnancie zaligher memorien den voorderen van onsen ghenaedighen heere ende prince hemlieden niet en vervoorderen daerot te ontmaeckene alienerene transporteren ende belastene in wat manieren dat zy niet uutgheleyt ten behouve van yemende noch om eenighe Godshuusen by middele ofte anderssins ende dat up de peyne van hondert ponden parisis ten proffyte van onsen voorseyden heere ende der voornomde stede ende daer men eenighe edifficie ofte afsluutinghe dade by metsinghe van meuren ofte anderssins in prejudicien van dezen up die gheaboliert te zyne ende te nieuten ghedaen oic mede dat hem niemant wie hy zy hem en vervoordere binnen den zelven scependomme hem te ontvriendene van den zelven huusen ofte erfven het en zy dat zy die onterfven ende erfven metter wet van der voorseyde stede naer de costume daerof onderhouden up ghelycke peyne ende verbuerte van ghelycke hondert ponden par
</main>
<end>
Aldus uutgheroupen ende ghecondicht ter camere den 11e dach van April 1509 naer Paesschen Present Willem de Tollenaere bailliu Hughe Ruebin proofst Jan de Ryckere Malin Beert by advise van de wet ende raden van de voorseide stede
</end>