Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1520_1

<begin>
</begin>
<main>
Uute dien dat men in voorleden tyden gheuseert heeft te desen vierschaere dat zo wanneer eenich persoon zynen debytuer ende schuldenare hadde doen beclaghen dat dien debyteur vermochte hem te leveren voor de betaellinghe van der selver schult in handen van den erediteur den welcken dien moeste houden ofte doen houden ghevanghen ende legghen up zekere ghetal van voeten naer der voorstrate met anderen ceremonien buten treive van rechten Zo eist dat omme zulcke coruptele costumen te abolieren ende te nieute te doene ghestatueert ende gheordonneert by bailliu ende proofsten scepenen ende rade dat zo wat persoon hem voortan zal willen leveren ter betaellinghe van zynen schult dat den credituer zal vermoghen die te houden ligghende in vanghenesse van der stede met hem te voorsiene van ate ende van drancke ende redelick zynen noot durst te doen hebben ter discretie van de wet als derof gheschil valt ende indien zulcke persoon uutvanghenesse bracke ofte uut liepe de schult daeromme niet quite wesende nemaer zal den crediteur gheheel blyven omme die te vervolghen up hem of zyn goet naer zynen goeden raet
</main>
<end>
Aldus uut gheroepen ter Crusse desen xxmen in July XVc ende XX
</end>