Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1529_1

<begin>
</begin>
<main>
Uutedien dat diverssche jonghe lieden ende ghesellen wesende in de guarde ende gouvernement van huerlieder vaedere ende moedere ofte voochden by quaden rade omme huerlierder zinnelichede affectie te vulbringhen hemlieden daeghelix vervoorderen diverssche coopmanscepen en financhen te doene ende groote sommen van penninghen te vertheren in de herberghen ende tavernen van deser stede ende elderen daerzy frequenterende ende verkeerende zyn te huerlierder gheheelder bedefvenesse ende ten grooten verdriete ende onghenouchte van den zelven huerlierders ouders voochden vrienden ende maghen So eyst dat omme daerinne te voorziene bailliu ende scepenen van der stede van Curtrycke ghekuert gheordonneert ende ghestatuert hebben dat niement van wat state ofte condicie hy zy herberghier tavernier ofte andere hem en vervoorderen eenighe jonghe lieden ofte ghesellen wesende in gouvernemente van vadere moedere ofte voochden eenighe ghelaghen te borghen eenich goet te vercoopene leenighe ofte financhen van ghelde te doene up zekere ofte zonder zekere te betaelene by atterminacie van tyde uphuerlierder huwen goedt versterfven ofte andersseins up peyne van den zelven ghelaeghen vertherde costen goet vercocht ofte penninghen gheleent te verliesene ende an hemlieden zelven t' hebbene ende ghepriveert te zyne van allen actien die hemlieden zouden moghen competeren omme by justicien dat up hemlieden ghehuwet huerlierder zelfs wesende borghen ofte andersseins te moghen innen ende vercouvereren breeder van vyf schellinghen par ende boven dien zulcke herbergiers taverniers vercoopers financhiers ende borghen van zulcke jonghe lieden ofte weesen ghecorrigiert ende ghepugniert tzyne ter discrecie ander in exemple
</main>
<end>
Actum den 7en in Sporcle XVe neghenentwintich present Dale proost heere Beert Ryckere ende Clercq scepenen
</end>