Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1530_1

<begin>
</begin>
<main>
Uutedien dat zeker clachten ende doleancien commen zyn an bailliu ende scepenen deser stede van dat diverssche personen beclaecht ende toeghesproken wesende ter vierschaere deser stede omme huerlierder crediteurs te zuere te maken van huerlierder schult te protraheren de betaelinghe legghen in faicte contrarie der waerheyt dat huerlierder partie de zake uut ghestelt heeft dach ghegheven van betaelinghe tot zeker daeghen oft termynen toecommende ofte andersseins die men nompt vermeten van bezyden alzo nactelic calumpnierende met huerlierder partien thueren groote griefve ende verdriete in verachteringhe van justicien So eyst dat omme daerinne te voorziene bailliu ende scepenen gheordonneert ende ghestatueert hebben dat zo wat partien ter vierschaere zulcke ofte ghelycke faicten ende vermeten van bezyden sustineren ende baptiseren zullen ende daerof succumberen by faulte van preuve dat zy in dat cas verbueren zullen de boete van drie ponden par te weten de twee deelen ten laste van partie ende tderde derde van den procureur die zulcke partien dienen zullen deen helft ten proffyte van der Kon Mat ende dander helft van der stede
Item es voorts gheordonneert dat zo wanneer zulcke partien gheadmittert werden ter verifficacie van huerliederen faicten ende van zulcke vermeten van uutstelle ofte bezyden dat zy van nu voortan maer hebben en zullen twee daeghen van beleedene deerste up versteken ende dander versteken nisi purget ten ware dat den juge dochte datter meer delayen toedienden die in dat cas staen zullen te huerlieder discrecie
</main>
<end>
Aldus ghepublieert in vierschaeren den 26en in October 1530
</end>