Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1537_1

<begin>
</begin>
<main>
Omme dat vele ende diversche persoinen gaende directelic jeghens tghebodt Godts ende de welvaert van huerlieder evenkersten daeghelicx hemlieden vervoorderen den goeden lieden fynanchen te doene ende onder tdexele van coomescepe te userene van wouckere ende andere ongheoorloofde winninghe twelcke causeert een groot quats lezie ende schaede onder tghemeente niet ghedooghelic so eyst omme daer inne te voorsiene bailliu proosften ende scepenen van der stede van Curtricke ghestatueert verboden ende gheinterdiceert hebben alle manieren van lyeden van wat state ofte condicie die zyn eenighe penninghen by voorme van fynanchen te leenen eenich goet hoe daenich dat zy te vercoopene ten hooghen prouse prize by paymente ofte atterminacie van tyde an eenighe personen niet wesende van der zelver neringhe ofte userende van der coopmanschepe van zulcke goeden tzy wullen zyden laeckene schoonlakenen ofte andersseins niet uutghesteken ende generaelic alle contracten usuraire te maeckene met huerlierder evenkersten meinsche up peyne van zulcke fynanchen vercoopinghen ende contracten usuraire verclaerst te zyne by justicien nul negheen ende van onwerden ende zulcke debiteurs ende huerlieder borghen te ghestaene mits restituerende de penninghen hemlieden gheleent ofte betaelen de juuste werde ende estimacie van den goede hemlieden zo vercocht naer tbevindt dat ghemeenlic galt ter date vander leveringhe zonder eenich croisen daervan te gheldene niet jeghenstaende dat de lettren ende obligatien van dien ghemaect ende ghepasseert voor wette alse andersseins ter contrarie verclaerssen ende boven desen sulcke fynanchiers vercooperen ende usuriers ter causen van dien arbitraerlic ghecorrigiert ende ghepugniert te wesene ter discretie
</main>
<end>
Ghepubliceert ter bretesque den 5e in Maerte 1537 present Ghiselbrecht Crommelin proost ende Beert scepene
</end>