Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1540_1

<begin>
</begin>
<main>
Uute dien dat diverssche personen hemlieden daghelicx vervoorderen te commen coopen in de wenduwen deser stede zeker catheilen dewelcke ghehouden zyn t'henden veertich daghen daernaer daerof betalinghe te doen op heerlich executie ende wandt diverssche personen omme 't ontgaene van betalinghe ende van vanghenesse hemlieder absenteren zo en can s'prysers clerc gheen inninghe van dien ghecryghen t'zynen grooten scade achterdeel ende verdriet versouckende midts dien provisie Zo eist dat omme daerinne te versiene bailliu proossten en scepenen ordonneren ende statueren dat zo wanneer men dereghdelick betoghen can dat eeneghe personnen catheile ghecocht hebben in de venduwen die men voortan anhouden zal binnen deser stede dat danof den ghelimiterden tyt van XL daghen voorleden zy personnen ghesommert zynde omme betalinghe van hueren ghecochten catheilen t' hebbene dat sprysers clerc volghende der oude costume zulcken personnen ter inninghe van dien zal moghen heerlic doen vanghen ende daer zy hemlieden absenterden ende niet wel vindelinc en waeren dat 't zelfs prysers clerc in dat caes zal moghen gaen of doen gaen met een van den officiers van deser stede t'huerlieder huuse ende aldaer doen anverden zulcken pant als hy daer vinden zal werdich wesende de somme die zy sculdich zyn ende dien met hem wechdraghen ende onder hem houden zeven daghen ende zeven nachten omme indien zy binnen de zelven zeven daghen niet en betalen den zelven pant te doen vercopen met ghereeden gheld wederkerende datter overschiet
</main>
<end>
Aldus uutgheroupen ter Cruce IX in Sporcle XVc veertich
</end>