Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1542_1

<begin>
</begin>
<main>
Uute dien dat ter kennesse van proofsten ende scepenen commen es dat eeneghe poorters van deser stede wonende van der kastelrie binnen de prochien daer de bailliu vermach kercgheboden te doen doene maintenieren onghehouden zynde jaerlicx consent te haelen ende zeker te doen van te moghen afwonen zo anderen poorters van der zelver stede afwoonende ghehouden zyn van doen Ende wandt den crediteurs ende scultheesschers van zulcken persoonen niet en vermoghen hemlieden te doen beryden of te doen beclagen metter officiers ende wethouders van der stede midts dat de plaetse daer zy haerlieder residencie houden buuten der juridictie es van deser stede So eist dat omme hierinne te voorzien men ontbiedt en bevelen eenen veghelicke poorter der voorseide stede die zoude van der voorseide stede en castelrie weder zyn residencie ende heurlieder woonste hauden binnen der prochien daer de voorseide bailliu van Curtrycke vermach kercgheboden te doen doene ofte niet dat zy commen binnen veertich daghen naer de date van deser publicatie haelen consent an den prooste ofte proosten van deser stede zeker doende naer de costumen van te moghen afwonen up peyne van ghecallengiert ende ghepryvert zyn van heurlieder voorseide poorterie ende te betalen den thiende penninck van heurlieder goede volghende den costumen ende rechten van der voorseide stede
Item werden die ghehouden de zelve afwonende poorters 't voorseide consent ende zeker jaerlicx te doen vernyeuwen up ghelyck peyne
</main>
<end>
Aldus uute gheroupen ter camere den vierden in January XVc XLII
</end>