Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1545_1

<begin>
</begin>
<main>
Uutedien dat daeghelicx diverssche abusen ghecommitteert worden by den prysers deser stede int executeren van den vonnessen ende sentencien ghegheven by scepenen van der stede van Curtrycke ende dat int doen instellen ende vercoopen van de lieden goede die ghecondampneert zyn twelcke by huerliederen maniere van doene te vylen ende snooden ende vercocht wert ter grooter schaede ende interreste van de debiteurs ende oic ten griefve ende lesie van de crediteurs die dicwils daerby gheen vulcomminghe van huerlieder sentencie vercreghen en connen so es by bailli ende scepenen omme daerinne te voorsiene gheordonneert ende ghestatueert by vorme van kuere ende statuute de pointen ende artickelen hiernaer volghende
Eerst es gheordonneert dat van nu voortanne de prysers zullen ghehouden zyn huerlieder kercgheboden zelve te doene ofte te doen doene by persoon ydone ende der wet agreable binnen der kercke van de prochie daer den debiteur wonachtich es naer dat de processie omme gheghaen wert voor tangaen van de hoochmesse ofte binnen der offerande ende daerof alvooren te adverteren den prochiepape up peyne indien de voorseide kercgheboden anderssins ghedaen waeren te verbuerene telcker reyse drie ponden par ten laste van den prisere
2. Item zyn ghecommitteert by heere ende wet drie personen die van nu voortanne alle afghewonnen goet innestellen zullen dat buten der stede ende scependomme ter execucie van ghewysde by den voorseide prysers vercocht zal wesen die dat ghehouden werden te redelicken ende tamelicken prise inne te stellene verbiedende ende interdicerende mits dien voortsan de voorseide prysers zelve instelders van goede te zyne ofte anderen personen te nemene omme dat inne te stellene verhooghen doen verhooghen ofte coopen noch oick eenich verstant part ofte deel metten coopers thebbene up de peyne van thien karolus guldenen voor deerste reyse ende voor de tweetste reyse twintich karolus guldenen ende voor de derde reyse dertich carolus guldenen ende de andere arbitraire correctie ter discretie
3. Item zo wanneer nu voort anne de prysers eenighe vercoopinghe doen zullen van moeublen goede als huuscatheilen perden coyen scapen ende dierghelycke roerende goet uut crachte van sentencie ghegheven in judicio contradictoire ofte daer partie by der sentencie attermynacie van tyde ende payementen gheaccordeert zyn die zullen zy doen volghende de ordonnancie hemlieden hier te vooren ghegheven behoudens dat den debiteur zyn goet zal mueghen lossen binnen zeven daeghen naer de vendicie nietmin zal tzelve goet vertransportert werden tot de zeven daghen overleden zyn ende ghestelt inmain sequestre te wetene in een van zyn ghebueren hove ende huuse ten zy dat hy debiteur souffisanten zekere stelle tvoornomde goet in staete ende wesene te houdene omme daer hy de lossinghe niet en dede binnen de voornomde tyde alsdan by den coopere ghelicht te wesene ende zynen wille te doene
4. Item ende zo wanneer de prysers omme vulcomminghe van ghelycke sentencie vercoopinghe doen zullen van staende ende onroerlicken goede als huusen boomen hau van houte besayte ende vruchten die zullen zy oic doen volghende dordonnancie daerup ghegheven behoudens dat den debiteur zulc goet zal moghen lossen binnen veerthien daeghen daernaer ende daer niet zo zal den coop sorteren ende zal den coopere met dien goede doen zyne gheliefte
5. Item zo wanneer de voorseyde prysers omme executie thebbene van ghewysde by contumacien vercoopinghe doen zullen van de voornomde roerende en onroerende goeden gehouden werden van dien den coopers te ghevene zes weken dach welverstaende dat de debiteuren dat zullen moghen lossen binnen den interval van tyde boven verclaerst
6. Item alle schulden renten ofte verbanden ghepasseert up heerlicke executie zal men innen by pandinghe van den persoon ofte zyn goet ghereserveert prince-penninck ende men zal zulcke personen ghepant dach maecken ten naersten vierschaer daeghe omme zyn panden te commen beschudden ofte te zien afwinnen naer costume ende als dan zal men die vercoopen als van ghewysde
7. Item annopende den vonnessen ghegheven ter caemere die zullen den schoutteten ende onderbailliu deser stede executeren realic ende by faicte by vanghinghe van den persoon van den ghecondampnerden ofte hantslaeninghe ende inventoire van huerliederen goeden die zy ghehouden werden in ghescrifte te stellene ende die over te ghevene ende delivreren in handen van den prysers deser stede omme danof vendicie te doene als vooren
8. Item es voorts gheordonneert dat de prysers naer dat zy de vercoopinghe voorscreven ghedaen zullen hebben werden ghehouden de billetten van der voornomde vercoopinghe mitsgaders uut crachte van welcker de vercoopinghe ghedaen es te bringhen in lanxsten binnen acht daeghen daernaer in handen van scepenen omme daermede ghedaen tzyn dat reddene bewysen zal
9. Item es voorts gheordonneert dat men van nu voortanne alle wettelicke briefven van renten ofte andersseins zal doen instellen present scepenen int stadthuus metten bernen van der kersse ende daeraf doen drie kerckgheboden ende erfven met den cloppe van den hamere als afghewonnen huusen danof den clercq hebben zal voor tscriven van den kerckghebode twee schell paris van elck kerckghebodt zonder meer
10. Item es gheordonneert dat den clercq van den venduwen deser stede van nu voorts anne ghehouden wert bouck te houdene van den nampten die men voortsanne vercoopen zal binnen deser stede ende daerinne te teeckenen den name ende toename van den crediteur die de vercoopinghe zal doen doen den debiteur ende de partien van baghen ende catheilen die vercocht zullen wesen den coopere van dien mitsgaeders den prys ende cause waer vooren de vendicie geschiet es up de peyne indien hy de contrarie dade telcker reyse te verbueren drie karolus guldenen
Aldus uutgheroupen ende ghepublieert ter bretesque deser stede den 14e in November 1500 vyfenveertich
Ende ten fyne dat dese ordonnancie in alle haere poincten ende artikellen geobserveert ende onderhouden worde so hebben scepenen gheordonneert ghestatueert ende gheauctoriseert omme instellers tzyne van alle afghewonnen goet de vier stede-cnapen deser stede metgaeders den messagier verbiedende ende scerpelic interdicerende de voorseide prysers up de peyne in de voorseide keure behelst gheen ander personen te nemenen omme eenighe instellinghen te doene oic de voorseyde instellers gheen instellinghe van goede te doene en zy dat hemlieden ghetoocht zy d'acte van de sentencie mitsgaeders tbillet van den scepene ten fyne dat alle vercoopinghen wel ende behoorlic moghen ghedaen worden zonder fraulde ende ter bewaernesse van partien
</main>
<end>
Factum lesten in April XVc LII
</end>