Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1550_1

<begin>
</begin>
<main>
Uutedien dat men bevonden heeft dat diverssche prochessen daeghelix ghepertraheert ende verlinct worden duer tvercrighen van diverssche requesten civillen die parthien zomtyts langhe onder hem hebben ende commen presenteren alsmen de determinacien van den prochessen uuten ende pronunchieren zoude ten grooten laste ende griefve van parthien So es by heere ende wet gheordonneert omme daerinne te voorsiene dat men van nu voortan uzeren zal alser drie dinghedaeghen overleden zyn van acht daeghen te acht daeghen sichtent t'impetreren van der voorseide requeste civile dat men de zelve requeste als extinct ende binnen behoorlicken tyden niet ghepresenteert rejecteren zal ende de impetrant priveren van den effecte van diere ende ten principaele recht doen naer de gelegenthede van de zaecke ende zal oic den impetrant van zulcke requeste civile moeten met eenen exhiberen zyne nieuwe faicten ofte alzulcke andere faicte daertoe hy de zelve requeste vercrighen heeft up de lamproye van xxiv s gr
Item zo wanneer by yemant eenighe requeste civile ghepresentert wert calumpnieuselic omme de zaecke ende trecht van parthien te traineren laeten hem versteken van nieu faicten te proponerene ofte encqueste ofte indien hy gheen nieu faicte en dient nemaer alleenelic zyn oude repeteert ofte de zelve faicten tzy oude ofte nieuwe faicten niet en veryffiert daertoe hy nochtans de zelve requeste vercreghen heeft zo zal men den voorseiden impetrant terstont over zyn calumpnie condempneren in de boete van III lb parisis over deertste reyse over de tweetste reyse in drie karolus guldenen ende voorts ter discretie van scepenen naer de calumpnie
Te verdeelen de voornomde peynen in drien deen derde ten proffyte van den ghonen wiens recht by zulcke frivole impetracien gheretardeert wert dander derde ten proffyte van de Koe Mat ende tderde derde ten proffyte van der stede
Werdt oick op ghelycke boete den impetrant van zulcke requeste civile ghehouden te doen zyn beleet ofte productie die hy mainteneert uuyt crachte van diere te doene binnen veerthien daghen naer tpresenteren van der zelver requeste up peyne van dies versteken tzyne zonder meer dachs
</main>
<end>
Aldus ghepublieert ter bretesque den eersten in September XVe vichtich
</end>