Compilatiecorpus Historisch Nederlands 1.0 (CHN): ambtelijke teksten 1250-1800: kortrijk_1550_3

<begin>
</begin>
<main>
Ghezien by proosten ende scepenen tproces gheresen ter camere tusschen Hector Bette scouteten Pieter vander Mersch upper-aman ende elc zo hy gheprocedeert heeft principale heesschers ter eender zyde ende Willem Caelewaert onder-amman verweerere ende heesschere by reconventien ter andere de productie van oorcondscepe by partien ghedaen metten recepissen by den verweerere gheexhibeert reprochen ende salvatien daerup ghemaect ende voort al ghesien dat in deze zaeke behoirt ghezien te zyne de voirschreven proosten ende scepenen recht doende verclaersen ende wysen int wettelic verbot by den voirnomden heesschers vercreghen ende den verweerere als onder-amman ghedaen doen van gheen clachten ende pandinghen met wettelicke briefven te doene met goeder causen ghedaen wesende ende over zulc te sorteren effect interdieerende by desen den selven onder-amman van nu voort meer zulcke clachten ende pandinghen met wettelicke briefven te doene
Item nopende den poinct litigieulx van den boeten beede de ammans anclevende verclaersen den upper-amman met zynde presentatie te ghestaene ende als anclevende de clachten by den upper-amman ghedaen up eenen Clays de Poortere condempneren den zelven upperamman daerof executie te doene achtervolghende dersententie by den onder-amman daerof vercreghen ende dat binnen zes weken naer de daete van desen ofte by faulte van dien wysen hem upper-amman dat zelve te betaelen condempnerende den verweerere in de twee deelen van de costen by den heesschers ghesupporteert int achtervolghen van deser instantie
</main>
<end>
Actum den vyfsten in Maerte XVe vichtich
</end>