Compilatiecorpus Historisch Nederlands 1.0 (CHN): ambtelijke teksten 1250-1800: leiden_1322_1

<begin>
Allen den ghenen die dese letteren zellen zien of horen lesen Make jc kont ende kenlike Jonfrou aechte heynen dochter van velsen
</begin>
<main>
dat jc machtich mire sinne ende redene bi minen vrien wille ende bi minen gane ende stane hebbe ghegheuen ende gheue jn testamente ende in rechter aelmossen simpelike om godes willen ende om Salichede mire zielen den gasthuse van leyden Alle goed ende erue die mi aneghecomen zijn van rechter erfnesse van Jsebrands mijns broeders doet daer god die ziele of hebben moet Ende alle goed ende erue roerende ende onroerende voerseyt mi te tide ane teuaen vtghenomen husinghe ende jmboedel alst was in sinen lesten liue maer meester hughe mijn broeder ende yde jsebrands wedewe zellen dese husinghe ende jmboedel besitten onghedeelt jeghens tgasthuis alzo langhe als zi leuen ende na harer beyder doet sal tgasthuis nemen sine grote alset jonfrou aechten ane bestoruen was van jsebrands haers broeders doet voerscreuen
</main>
<end>
Jn kennesse dere dinghe zo heb jc jonfrou aechte voernoemd desen brief met mijns zelfs zeghel beseghelt Ende omme die meerer zekerheede zo heb jc ghebeden wisen lieden ende bescheydenen haren henrike spiker prouisor ende deken van rijnland dat hi dese letteren beseghelt heuet met Sinen zeghel Ende den Rechter Scepenen ende den Raedsmannen van leyden dat Sine beseghelt hebben met harer ghemeenre poerte zeghel Ende wi henric spiker voernoemd om bede jonfrou aechten zo heb ic desen brief met minen zeghel beseghelt ende Rechter Scepene ende raedsmanne voerseyt hebben dese letteren met onzer poerte zeghel beseghelt jn kennesse der [voirscreuenen] dinghe Ghegheuen Jnt iaer ons heeren dusent driehondert ende [ouetentwintich] des vridaghes na Sente [gheertruden] daghe jn maerte
</end>