Compilatiecorpus Historisch Nederlands 1.0 (CHN): ambtelijke teksten 1250-1800: leiden_1335_1

<begin>
WJ pieter gouburghe sone ende hughe phillips sone Scepene in leyden maken cont ende kenliken allen luyden
</begin>
<main>
Dat remburch gosekiaens weduwe ende Gosewijn hore sone die hoir rechte mombair is vrederic ende Gouburch remburghe kinder voirseit vircoft hebben mit ghesamender hant ende elc mit siins mombairs hant dies te doene hadde heren Gheraird van der hogherstrate priester pieters sone voirseit Een pont hollants vriis ghelds iairlixser renten op hoir huys ende op hoir erue dair si nv ter wilen in woenen ende beleghen hebben Jan grieten sone mit sinen huyse ende erue an die ene side ende wildiic mit sinen huyse ende erue an die ander side Ende dese renten voirseit iairlix te betalen tote paischen Ende remburch gosekiaens weduwe ende goeswiin hoir sone hoir rechte mombair vrederic ende Gouburch remburghe kinder voirseit hebben hem beliet van desen pont ghelds voirscreuen vol ende albetailt den lesten penning mitten eyrsten
</main>
<end>
Jn oirkonde desen brieue besegelt mit onsen seghelen Ghegheuen int iair ons heren duysent drie hondert viif ende dertich swoensdaghes na palmen paischen
</end>