Compilatiecorpus Historisch Nederlands 1.0 (CHN): ambtelijke teksten 1250-1800: leiden_1335_2

<begin>
WJ ghered gorijs ende hughe philips sone scepene jn leyden Maken cond ende kenlike allen luden
</begin>
<main>
dat hair ghered hoestraet pieters soen ghecoft heuet tieghens janne vranken sone een deel lands dat bi gheleghen es jn enen camp van twaelftalf hond lands luttel min jof meer legghende in den wairt vp gans oirde die dierix willaems soens van der dobbe plach te wesen dair jan van den rine van Coudekerke tvierden deel ane heuet ende van dien dats dair dan bliuet dat mid janne van den riin voirseyd mid ghemeenre voir leghet soe heuet hair ghered die rechte helfte ghecoft alst voirscreuen es omme twaelf pond hollansche dair hem jan vranken sone voirseyd of beliet heuet vol ende al betaelt den lesten penninc mitten eersten wilc land voirghenoemt beleghen hebben die heren van den duutschen huze ende daniel wten wairde ane die ene zide ende pieter veren gouburghe sone ane die ander zide Ende wair dat zake dat hair ghered voirseit jof sine nacomelinghe scade jof hinder namen bi den voirscreuen lande jof bi der bruucware van dieric willaems sone van der dobbe voirseyd [of] [van] yemend anders van sinen weghen dair belouet jan vranken [soen] [] voirseit voir hem ende [voir] [sine] nacomelinghe heren gheredde voirghenoemt ende sinen nacomelinghen scadeloes of te houden
</main>
<end>
In oirkonde desen brieue bezeghelt med onsen zeghelen Ghegheuen jnt jaer ons heren Dusent drie hondert viif ende dortich vp sente marchus dach ewangelisten
</end>