Compilatiecorpus Historisch Nederlands 1.0 (CHN): ambtelijke teksten 1250-1800: leiden_1337_2

<begin>
WJ heyne van der bregghe Ende Gheret Riiswiic vranken soen Scepene in leyden Maken cond ende kenlike allen luden
</begin>
<main>
Dat Reymburch goessekiins wedewe vrederic hoir soen die hoir mombair es Ende gouburch Reymburcghe kinder voirseyd vercoft hebben mid ghesamender hand ende elc mid siins mombairs hand dies te doen hadde haren Gheredde hoecstraten pieters soen priester Tien scellinghe hollandsce vryis ghelds jairlixer Renten alle jare te versien vp hoir huys ende vp hoir erue dair si nu ter wilen jn wonen Ende beleghen hebben jan grieten soen mid sinen huyze ende erue ane die eene zide Ende wildiic mid sinen huze ende erue ane die ander zide Ende dese voirscreuen Renten zelmen jairlix betalen te paeschen Ende Reymburch vrederic ende gouburch voirnoemt hebben hem belyet van desen tien scellingen siaers voirscreuen vol ende al betailt den lesten penninc mitten eersten
</main>
<end>
Jn oirkonde desen brieue bezeghelt mid onsen zeghelen Ghegheuen jnt jair ons heren dusend drie hondert zeuen ende dertich des vridaghes na sente [seruaes] dach
</end>