Compilatiecorpus Historisch Nederlands 1.0 (CHN): ambtelijke teksten 1250-1800: leiden_1344_3

<begin>
WJ andries hansoeten sone ende hughe van suieten scepene in leyden maken cont allen luyden
</begin>
<main>
Dat hughe de vechter ende pieter siin sone voir ons quamen ende gelieden dat si vircoft hebben mit ghesamender hant ende elc voir al reynsent bertelmeus weduwe van der bregghe Een pont hollants vrijs ghelds siairs op hoir huys ende op hoir erue dat si hebben binnen leyden ende beleghen heeft airnt de snider mit sinen huyse ende erue an diene side ende clays van [rensburch] mit sinen huyse ende erue an dander side Ende voirt op hoir [huyse] [ende] op hoir erue dat si hebben buten leyden dair si nv ter wilen hoir verwerie houden dat beleghen heeft arnt de potter mit sinen huyse ende erue an diene side ende gheertruyt ysebrands mit horen huyse ende erue an dander side ende dese renten voirseit jairlix te betalen tote voirscoter marcte ende tote valkenburgher marcte
</main>
<end>
Jn oirkonde desen brieue beseghelt mit onsen seghelen Ghegheuen jnt jair ons heren duysent drie hondert vier ende viertich des saterdaghes na sente posikiaens daghe
</end>