Compilatiecorpus Historisch Nederlands 1.0 (CHN): ambtelijke teksten 1250-1800: leiden_1345_1

<begin>
Wi anderijs han zoeten soen ende costiin van der bregghe scepen in leyden maken cont ende kenlike allen luden
</begin>
<main>
dat voir ons quam philips pieters soen ende maect heren gheret sinen broeder magtich van sinen weghen alsoe langhe als hij in studie iof int scole laghe siin lant ende siin erue etsie sie van gheestelicken goede of van wairliken dat hij nu heft of hieren twisken vercrighen moghe teverhuyren die huyr intenemen vpteboeren ende quiten den ghenen diet gheuen ende te doen panden ende voir gherecht tebieden die niet en betalen toit horen daghe ende voirt alle dinghe tedoen ghelikelic offet philips selue waire Ende voirt wair dat zake dat philips voirghenoemt omboede et wair med brieuen of med wairachtighen boede dat hi ghelts tedoen hadde ende enen goit vercopen wilde soe heft hi heren gheret sinen broeder voirghenoemt magtich maect al sulc goit teuercopen ende tghelt dairof tontfaen tegheuen ende tebelegghen in alsulken oirbair als hem philips voirseyt ombieden sal ende hi heft gheloeft dat stade ende vast te houden
</main>
<end>
Jn oirkonde desen brieue bezeghelt med onsen zeghel ghegheuen jnt iair onsheren duysent driehondert viue ende viertich des vriedaghes na sent iacobs dach
</end>