Compilatiecorpus Historisch Nederlands 1.0 (CHN): ambtelijke teksten 1250-1800: leiden_1358_1

<begin>
WJ phillips Jan oems soen ende Jan duker Scepene in leyden Oirkonden ende kennen
</begin>
<main>
dat voir ons quam willaem Jans mans soen ende gheliede dat hi ghegheuen heuet Jannen sinen soen in puurliken aelmissen aldusdanich goet als hier na bescreuen staet Jn den eersten een campe lands die gheleghen is in den ambocht van zoeterwoude houdende drie morghen luttel min jof meer ende beleghen heuet hughe badzeleder an die noertzide ende die capelriecamp an die zuytzide ende nv ter wilen ghelt in hure ses pont hollants siairs Jtem in den seluen ambocht een campe lands op meerburgher weterinc die gheheten is poskiaens camp houdende vier morghen luttel min jof meer Streckende van pieter wouters soens land op den weterinc voerscreuen Jtem viertich scellinghe hollansche siairs vriis ghelts te virsiene op tien honde lands luttel meer jof min die gheleghen sien in den ambocht van noertich ende beleghen heuet wouter willaem coudenaers soen an die zuytoestzide ende die abbedisse van der lede an die noertwest zide Streckende van den madesloet an den wandelacker Jtem noch een pont siairs binnen leyden op reynburch goeskiaens huse ende erue op den rine dat beleghen heuet aliit wildiken an die ene zide ende claes rogghekiaens an die ander zide mit horen husen ende eruen Jtem in die perrochie van hogheland een pont hollants siairs op claes masts huse ende erue dat beleghen heuet wolbrant an die ene zide ende dircs van oestgheests kinderen mit horen husen ende eruen an die ander zide van wilken goede ende renten voerscreuen willaem weisert op droech vrielic mit dezen brieue Jannen sinen sone den rechten eyghendom alle renten oerbaer ende nutscip diere of comen mach van desen daghe werwaert te ziere behoef Jaerlix die voerscreuen renten vri op te boeren ende zinen vrien wille daer mede te doen
</main>
<end>
Jn kennesse deser waerheit So hebben wi dezen brieue beseghelt mit onzen seghelen ghescreuen Jnt jair ons heren dusent driehondert achte ende vijftich des vridaghes na vastenauond
</end>