Compilatiecorpus Historisch Nederlands 1.0 (CHN): ambtelijke teksten 1250-1800: leiden_1358_2

<begin>
WJ ysebrand Roetairds soen ende janduker Scepen in leyden doen cond allen luden
</begin>
<main>
dat Wy dair bi ende ouer waren alse Scepen dair die rechter pande An vranke dirx soens huys van den hoeke ende erue costijn van der bregghe ende airnde van der heyde rentemeesteren nuter tijt der Scepenen van leyden toit der Scepene die nutertijt zien behoef ses ende dertich scellinghen hollans van boeten der scepenen ende twie scellinghe hollans van boeten des scouten den derden penning meer van beyden dat loipt zeuen ende vijftich scellinghe hollans van elken ponde twie scellinghe hollans tsiairs dat loipt vijf scellinghe ende zeuen penninghe hollans tsiairs tebetalen alle jare toit voirscoter marcte wilke Renten die rechter gheeyghent ende quite ghescouden heft den Rentemeesteren voirscreuen Ende dat huys ende erue heft beleghen an die ene zide ghisebrecht cosijn ende an dander zide airnd ghereds zoen mit horen husen ende eruen Ende dese voirscreuen Renten zelmen uytRoken jairlixe voir enighen commer diere op is uytgheset ses ende twintich scellinghe tsiairs Ende dese voirscreuen Renten hebben dese costijn ende airnd voirscreuen voirt vircoft heren nyclaes jacobs soen priester Ende hughe [ghilen] neue scoute costijn van der bregghe jan duker philips jans soen ysebrand Roetairds soen pieter van hairlem arnd van der heyde willaem bort ende ghered heerman Scepen jan van braband ende ghered Rijswit raedslude hebben belouet mit ghezamender hand ende elc voir al dese voirscreuen Renten tewaren heren nyclaes voirnoemt jair ende dach vry ende commerloos Ende elc belouet den anderen scadelois tehouden van zinen elften deel
</main>
<end>
jn oirkonde desen brieue beseghelt mit onzen zeghelen Ghegheuen jnt jair ons heren m ccc acht ende vijftich op den tienden dach van aprelle
</end>