Compilatiecorpus Historisch Nederlands 1.0 (CHN): ambtelijke teksten 1250-1800: leiden_1358_3

<begin>
WJ ysebrand Roetairds soen ende jan duker Scepen in leyden doen cond allen luden
</begin>
<main>
dat wi dair bi ende ouer waren alse Scepen dair die rechter pande an dirc dirx soens huys ende erue dat gheleghen is op der volres graft ende beleghen heft an die ene zide claes louwerijs zoen ende an dander zide beudetkiaen die timmerman mit horen husen ende eruen costijn van der bregghe ende airnde van der heyde Rentemeesteren nutertijt der Scepenen van leyden toit der Scepenen behoef achtien scellinghe hollans van boeten der Scepenen ende twie scellinghe van boeten des scouten den derden penning meer van beyden dat loept dertich scellinghe hollans van elken punde twie scellinghe tsiairs dat loipt drie scellinghe hollans tsiairs Tebetalen alre jare toit alre heyligher misse wilke Renten die Rechter gheeyghent ende quite ghescouden heft den Rentmeesteren voirnoemt Ende voirt so hebben costijn ende airnd voirseit desen Renten voirt vircoft heren nyclaes jacobs soen priester Ende hughe ghiben neue scoute costijn van der bregghe jan duker philips jans soen ysebrand Roetairds soen pieter van hairlem airnd van der heyde willaem bort ende ghered heerman Scepen jan van braband ende ghered Rijswit Raedslude hebben belouet mit ghezamender hand ende elc voir al desen Renten voirnoemt tewaren heren nyclaes voirscreuen jair ende dach alse Recht is vry ende commerloes Ende elc belouet den anderen scadelois van zinen elften deel
</main>
<end>
jn oirkonde desen brieue beseghelt mit onzen zeghelen Ghegheuen jnt jair ons heren M ccc acht ende vijftich op den eersten dach van junius
</end>