Compilatiecorpus Historisch Nederlands 1.0 (CHN): ambtelijke teksten 1250-1800: leiden_1358_4

<begin>
WJ jacob vlaminx soen ende jan spronc Scepen in leyden doen cond allen luden
</begin>
<main>
dat quam voir ons heren Nyclaes jacobs zoen priester mit zinen ghecoren voghet ende gaf ouer heren pieter den hoeschen priestere mit Recht ende mit vonnesse alse Scepen wijsden dat Recht is vijf Scepen brieue dair dese Scepen brief duer ghesteken is mede tewinnen ende te virliezen gheliken offet heer nyclaes selue ware toit den priesteren ende ghesellen behoef dair die Renten van den duer ghesteken brieue onder ghedeelt zullen worden na zulken zegghen alse gheseyt is tusschen heren adaem van catwic ende pieter jacobs soen van zulker quetsinghe alse pieter ghedaen heft heren adaem voirseyt an zinen oghe voirt heft heer nyclaes bewiset ende ouer ghegheuen heren pieter toit der priesteren ende ghesellen behoef voirseit zeuentien penninghe hollans tsiairs te virzien op zijn huys ende erue dat beleghen heft an die ene ende heer nyclaes voirseit selue ende an dander side scout volquijns soen ende gheleghen is an den middel wech opt hogheland tebetalen jairlixe binnen den vier heylighen daghen van paischen Ende voirt heft heer nyclaes voirseyt belouet zulke Renten alse die scepen brieue jnhouden dair dese scepen brief duer ghesteken is dair die [summe] of is acht ende viertich scellinghe ende zeuen penninghe hollans ende dese zeuentien penninghe tsiairs voirscreuen van wilken Renten voirseyt die heel summe loipt vijftich scellinghe hollans tsiairs tewaren vry ende commerloes jair ende dach alse Recht is
</main>
<end>
jn oirkonde desen brieue beseghelt mit onzen zeghelen Ghegheuen jnt jair ons heren M ccc Acht ende vijftich tvridaghes voir sinte lucyen dach
</end>