Compilatiecorpus Historisch Nederlands 1.0 (CHN): ambtelijke teksten 1250-1800: leiden_1363_1

<begin>
WJ gheret van oistgheest rutgherts soen ende jan melijs soen scepene in leyden doen cont allen luden
</begin>
<main>
dat quam in ere pandinghe jacob beer ende pande an witte jans huys ende erue vpt nuwelant dat beleghen heft an die ene side jan coenen soen mid sinen huyse ende erue ende an die ander side die ouderiin sestien scellinghe hollans den dordrexen groten often vlaemschen voir achte penninghe als van cost van der graft maict den derden penning meer vier ende twintich scellinghe hollans payments voirseit den scoute voir sine boeten twie scellinghe hollans goits ghelts doit den derden penning meer in payment voirseit vier scellinghe dit comt te samen achte ende twintich scellinghe hollans payments voirscreuen dit maict ten jairlixen renten van den ponde twie scellinghe drie ende dertich penninghe hollans siaers payments voirseit Te betalen alle jare vp Sente pieters dach ad cathedram Ende dese pande voirseit stonden viertien daghe na dien dat si gheset waren Ende na dien viertien daghen quam jacob beer ende droich die pande voirseit vp jan philips soen die doe ter tijt een rechter was tot sheren behoif ende begheerde an den rechter voirseit dat hi him die pande eyghende van sheren weghen of mid recht an him helde aldaer die rechter voirseit die pande voirseit quite scout van sheren weghen tot jacobs behoif voirnoemt
</main>
<end>
jn oirkonde desen brieue beseghelt mit onsen seghelen Ghegheuen jnt jaer ons heren m ccc drie ende tsestich smanendaghes na groten vastelauont
</end>