Compilatiecorpus Historisch Nederlands 1.0 (CHN): ambtelijke teksten 1250-1800: leiden_1366_3

<begin>
WJ daniel jans soen ende gheriit heerman Scepen In leyden Oirconden
</begin>
<main>
dat aelwiin die cammaker belouede willem willems soen ende ysebrant roetairts soen nu ter tijt Raetslude binnen leyden jof diet namaels wesen sullen tot behoef sgashws tot leyden ses ende dertich pont hollants jn pamente als die ene Coeman den anderen mede betaelt als van die driedeel van een hws ende erue die dirc bwirs waren ende ghemien legghen mit aelwins vorscreuen vierendel ende die raetslude vornoemt aelwiin vercoften mit wilken ghelde vorseyt ende mit twaelf pont hollants paments diere sgashuus van aelwiin ontfaen hebben jn reden ghelde dirc buur mede ontfanghen is sine noettoerft te hebben bi rade ende goeddeyncken srecht van leyden jn den gashuus vorseyt siin leuen te betalen dese ses ende dertich pont voirseyt tot sinte jans misse tot midsoemer naest comende ende wes aelwiin vorseyt dan niet en betaelt dat mach hi onderhouden ses jair lanc durende naest comende sinte jans misse vorscreuen tpont om twie scellinghe hollants siairs jn pamente vornoemt ende soe tot wat tijt aelwiin wil binnen der tijt vorscreuen soe mach aelwiin dese vorscreuen beloeften minren tpont jairs mit tien ponden mit den vorscreuen Renten jn pamente vorseyt ende wes hi niet en minret noch of en doet binnen der tijt voirnoemt dat sel bliuen staen tot jairlixen renten tot poirtrecht te virsien ende staende op een hws ende erue dat vorscreuen is ende aelwiin nu ter tijt jn woent ende beleghen heeft an die ene side hadewi godeuairt tedemans soens wedue mit haeren erue ende an die ander side symon Rose mit sinen huse ende erue ende mit ere steghe diere tuschen gaet
</main>
<end>
jn orconde desen brieue beseghelt mit onsen seghelen ghegheuen jnt jair ons heren m ccc ses ende tsestich op sinte margrieten dach
</end>