Compilatiecorpus Historisch Nederlands 1.0 (CHN): ambtelijke teksten 1250-1800: leiden_1388_2

<begin>
WJ goiswijn claes soen Ende andries hughen soen Scepene in leyden oirkonden
</begin>
<main>
dat voir ons quam willaem Reyners soen Ende beliede dirc van zwieten sculdich te wesen elf pond ende twie scellinghe hollans comans payments tsiaers durende tot ewighen daghen te betalen alle jair die ene helfte tot voirscoter marcte Ende die ander helfte tot valkenburgher marcte van enen camp landes die willaem voirseit jeghens dirc voirscreuen ghehuert heeft tot poortrechte behoudelic dirc voirscreuen die ghifte van den lande oec hoet ghesplit worde voirt so sel men dit voirscreuen erue veruoirhueren waneert in besterften of in coops wair comt mid half den Renten voirseit Ende dat voirscreuen erue sel willaem voirscreuen bruken dat eerste jair sonder Renten te gheuen Ende dat ander jair dair na sel hi betalen mid half den Renten voirseit Ende dit voirscreuen lant Js gheleghen Jnden ambocht van leyderdorp Jnden wairt Ende beleghen heeft pieter hughen soen an die westzide ant noort ende die oude rijn mitten boomgairt an die oestzide dirc van zwieten Ende pieter hughen soen Ende ant zuyt ende willaem heynrics soen Ende willaem Reyners soen alle voirscreuen mid horen lande
</main>
<end>
Jn oirkonde desen brieue beseghelt mid onsen seghelen Jnt Jair ons heren duysend drie hondert acht ende tachtich vp den twalifsten dach Jn mairte
</end>