Compilatiecorpus Historisch Nederlands 1.0 (CHN): ambtelijke teksten 1250-1800: leiden_1388_3

<begin>
WJ goiswijn claes soen Ende andries hughen soen Scepene in leyden oirkonden
</begin>
<main>
dat voir ons quam willaem daniels soen Ende beliede dirc van zwieten sculdich te wesen achte pond ses scellinghe Ende achte penninghe hollans comans payments tsiaeirs durende tot ewighen daghen Te betalen alle Jair die ene helfte tot voirscoter marcte Ende die ander helfte tot valkenburgher marcte van enen camp lants die willaem voirseit jeghens dirc voirscreuen ghehuert heeft tot poortrechte behoudelic dirc voirscreuen die ghifte van den lande oec hoet ghesplit worde voirt so sel men dit voirscreuen erue veruoirhueren waneert in besterften of in coops wair comt mid half den renten voirseit Ende dit voirscreuen erue sel willaem voirghenoemt bruken dat eerste Jair Sonder Renten te gheuen Ende dat ander Jair dair na sel hi betalen mid half den renten voirseit Ende dit voirscreuen lant Js gheleghen in den ambochte van leyderdorp Jnden wairt Ende beleghen heeft an die westzide pieter hughen soen Ende ant noort ende an die oestzide willaem heynrics soen Ende ant zuyt ende jacob pieters soen Ende daem hughen soen alle voirscreuen mid horen landen
</main>
<end>
Jn oirkonde desen brieue beseghelt mid onsen seghelen Jnt Jair ons heren duysend drie hondert acht ende tachtich vp den twalifsten dach Jn mairte
</end>