Compilatiecorpus Historisch Nederlands 1.0 (CHN): ambtelijke teksten 1250-1800: leiden_1389_1

<begin>
WJ hughe van der hant Ende harman bitter Scepene jn leyden Oirkonden
</begin>
<main>
dat voir gherechte quam heer aernt [] bewairt priester mid zinen ghecoren voechts hant Ende gaf ouer aernt heren jans soen ziinre zuster zone twintichstalf morghen lants tot zinen vrien eyghen zinen wille mede te doen van welken lande gheleghen js neghendalf morghen Jnden ambocht van eslikerwoude dair derdalf morghen of beleghen heeft heer jan peter willen soens erfnamen an die zuytzide Ende gheertruyt Jan nuwenveens soens wedue Ende aernt heren jans soen an die noortzide Jtem pieter dircs soen vten veen ant oestende Ende ant westende griete Jan nuwenveens soens wedue voirt die ses morghen van den neghendalf morghen voirscreuen hebben in huerwair nv ter tijt pouwels Ende jacob doede Ende beleghen hebben griete Jan nuwenveens soens wedue Ende aernt heren Jans soen an die zuytzide Jtem griete Jan nuwenveens soens wedue an die noortzide ende ant oestende ghisebrecht hobben soen Jtem ant west ende mijn vrouwe van der doortoghe Ende [gherrid] costijns soen alle mid horen landen voirscreuen Voirt so legghen van den twintichstalf morghen voirghenoemt elf morghen Jn den ambocht van alcmade Ende nv ter tijt Jn bruucwair hebben Rengher vriesencoeps soen Ende pieter liclaes soen Ende beleghen heeft an die zuytzide dirc van [poelgheest] Jtem an die westzide Jan hughen soen van leyderdorp Jtem an die noortzide dat cappelrien lant van hoghemade Ende Rengher vriesencoeps soen an die oestzide alle mid horen landen
</main>
<end>
Jn oirkonde desen brieue beseghelt mid onsen seghelen Jnt Jair ons heren duysend drie hondert Neghen ende tachtich vp Sinte lambrechts auond
</end>