Compilatiecorpus Historisch Nederlands 1.0 (CHN): ambtelijke teksten 1250-1800: leiden_1392_1

<begin>
WJ willaem aernts soen Ende pieter butenwech Scepene Jn leyden Oirkonden
</begin>
<main>
dat voir ons quam florijs van den tol Ende gheliede dat hi vercoft heeft Jacob vranken soen drie morghen lants Ende een half hond lants dat gheleghen Js Jnden ambocht van coudekerk Jnden hoghen wairt Jn wigghers weer Ende florijs voirseyt ghemeen hadde mid Jan van den tol zinen broeder mid vranc ysac Ende mid ermegairt florijs Jans soens dochter Ende beleghen heeft an die westzide gheriid Jonghe dircs soen mid zinen kinderen Claes kengher Jans erfnamen van poelgheest heer Jan van poelgheest florijs van den tol gheriid kamp alijt dirc kerstans soens dirc van den tol Ende pieter vrederix soen Ende an die ander zide Jacob vinken soen mouwerijn van der does heynric van der does mitten aelmoes lande vranc ysac Ende die butter camp alle voirscreuen mid horen landen Streckende vten rijn vp an den wech Jnden laghen wairt Ende florijs voirscreuen louede Jacob vranken soen voirseit dat voirscreuen land te waren Jair Ende dach alse Recht Js als men een vrye volboden eyghen erue sculdich Js te waren Ende allen commer of te doen dier nv ter tijt vp staen mach Ende florijs voirseit beliede hem hier of voldaen Ende betailt den lesten penninc mitten eersten
</main>
<end>
In oirkonde desen brieue beseghelt mid onsen seghelen Jnt Jair ons heren duysend drie honderd twie Ende tneghentich tswoensdaghes na Jairs dach
</end>