Compilatiecorpus Historisch Nederlands 1.0 (CHN): ambtelijke teksten 1250-1800: leiden_1392_2

<begin>
Wj pieter wit ende pieter butewech Scepene jn leyden oirkonden
</begin>
<main>
dat voer ons quamen heren dirc naghel priester jan naghel gherijts soen Ende syman willems soen Ende ghelieden dat si vercoft hebben den deken ende den capittel tot sinte pancraes te leyden seuen hont lants gheleghen jnden ambocht van voerhout jnden hoghen Camp vanden west egghe jn Ende beleghen is an die noort side mitter heerstraet an die oest side jan naghel gherijts soen dat zwyt end meester andries mit lande dat sinte jacop cappelrie toe behoert welke cappelrie ghesticht js inder kerken tote voerhout an die west syde hughe van alcmade jans soen vanden woude Ende heer dirc naghel ende jan naghel gherijts soen voernoemt loueden mid ghezamender hant den deken ende den capittel voirseit van desen voerghenomden lande te waren vier hont lants jaer ende dach alse recht is als men een vri volboden eyghen erue sculdich js te waren ende allen Commer of te doen die daer nv ter wilen op staet sonder ses pennijnghe goets ghelts die op die marghen staen te tijnse des ghelijx so louede syman willem soen den deken ende den capittel voernoemt een halue marghen lants vanden voerseyden lande te waren jaer ende dach alse Recht js als men een vri volboden eyghen erue sculdich js te waren Ende allen commer of te doen die daer nv ter wilen op staet sonder ses pennijnghe op die marghen te tijnse alse voirscreuen js Ende heer dirc jan naghel ende syman willems soen lieden hem elx van horen aendeel hier of voldaen ende betaelt den lesten pennijnc mitten eersten
</main>
<end>
In oirkonde desen brieue bezeghelt mid onsen zeghelen Int jair ons heren duysent drie hondert twie ende tneghentich opten beloken pijnxster avont
</end>