Compilatiecorpus Historisch Nederlands 1.0 (CHN): ambtelijke teksten 1250-1800: leiden_1393_1

<begin>
Scout Scepene ende Rade der stede van leyden Doen cond allen luden
</begin>
<main>
Dat voir ons quamen heer Jan Zuurmont Commelduer [nu] [ter] [tijt] van Sinte pieters kercke te leyden Syman symans soen ende goessiin claes soen nu ter tijt ghasthuus meesters van Sinte katrinen [ghasthuus] te leyden ende toenden ons een jnstrument jn houdende als dat pieter symans soen vanden noirde hem luden gheset heeft

als [commelduer] ende ghasthuus meesters die nu ter tijt siin of namaels wesen sullen tot ewighen daghen Executoers ende [bewaerders] [] [] [husingen] die hi ghemaict heeft puurlic [om] goods wil [ende] in [rechten] testament mit sulken [] als hier[ n]a [gesproken] [] [] [om] [] vrouwen persoenen [in] te wonen alsmer mit [minnen] [] [] ghemaec jn scicken mach die [onghehindert] [] [] [] of van kinderen ende die gode willen dienen ende leuen ende [der] werelt ende den sonden steruen die si [ontfanghen] [sullen] tot [allen] [] [] [] siin ende dair jn so en sellen si niet aensien maechscap vrientscap [moghentheyt] noch [ghienrehande] [] [mer] [al ie]n die eer [goods] [zeedicheit] ende [doechden] der persoenen na hoirre bester [weten] [ende] vijf zinnen ende waer si twie ghaen van [] dien voirscreuen of die [] [] in horen staet sellen siin jn allen zaken die dat huus voirnoemd roeren daer zel die derde volghen

Ende want alle gheordineerde dinghen vredelic siin ende alle ongheordineerde dinghe onvredelic So hebben si om die eer goods Zalicheit ende vrede der menschen bi consent ende goitdencken van ons een ordinancie ghemaect dair hem die persoenen die nu ter tiit jnder husinghe voirscreuen wonen of namaels wonen sellen bi regieren sellen Ende so wie des niet doen en wil die sellen die Commelduer ende ghasthuus meesters voirseyt of diet namaels wesen sellen vter husinghe voirscreuen doen buten yements wederzegghen Inden eersten So sellen die Commelduer ende die ghasthuus meesters voirseyt of diet namaels wesen sellen wt den huse voirnoemd kiesen na hoirre consciencie twie goede rackelike persoenen die dat huus regieren ende besorghen sellen mit eendrachticheden ende met minnen in allen dinghen des dat huus nootturftich js ende die sellen si moghen virsetten tot allen tiden als si hem virbeteren moghen Ende waer dat zake dat dese twie persoenen tot enigher tijt scheelden in zake die den huse toe behoerden So sellen si die zake of zaken an brenghen den Commelduer ende den ghasthuus meesters die dan te tide siin ende wat hem die dair jn beuelen te doen dat sellen si doen ende daer mede te vreden siin Ende die twie bewaersteren sellen alle weec een vanden persoenen die inden huse wonen beuelen die maertscap van ghemeenre pottaedse te coken sulc als si hoir beuelen Ende so wat si coict het sie moes erwten melc of anders wat wel of qualic ghecoict dat sellen die ander minnelic nemen ende gode dair of dancken Ende waer dat zake dattet der ghemiente bet diende datter een stadighe maerte bleue so moghen die twie bewaersteren een daer toe scicken diere hem nutste toe denct wesen ende die sellen die ghemien persoenen die inden huse wonen horen arbeit besceydelic lonen biden twien bewaersteren Ende die pottaedse ende dat daer toe behoirt sellen si gheliic mit malcander ghelden tot dat si op haer renten ghecomen siin die pieter symans soen voirnoemd den huse voirseyt besproken heeft tot pottaedse ende tot anders dat dat [huus] [jnt] [ghemien] behoeft als siin testament daer of jn hout Jtem so en sellen die persoenen die inden huse voirseit wonen nerghent buten tshuus virnachten noch buten huus hoir broot winnen mit ghienrehande ambocht dat si connen noch nerghent wtuaren noch ghaen wtgheset dan al ien om bier of om broot of om anders noottuftighe dinghen buten consent ende oirlof des Commelduers der ghasthuus meesters ende der twie bewaersters ende altoes tsauonds binnen huus te wesen ende te bliuen alsmen nachlicht luut Jtem so sellen si een goede slechte oetmoedighe wise hebben van clederen ende van sconen ende der werelt niet gheliken mit suuerliker uerwen mit costeliken ghewant mit ghefronsten ghecroicken hoicken met nauwen ghereghen ende hoghe op ghebesten rocken met valen of ghetumpeten sconen ende met anders al dair ydelheit in staet ende dair men der werelt mede behaecht ende gode mishaecht Jtem [waer] oic dat zaic datter enich vanden persoenen die inden huse voirscreuen woenden onzedich of onvredelic waer of enighe dinghen hantierde die der [ghemiente] scadelic lastelic of oneerlic waer of datter quaet gheruft van buten datmen mitter waerheyt betughen mocht of gheuiel of dat si puur hart virkeert onzegghelic ende onsterfelic hoirs eyghens quaets willen waer dien persoen sellen die twie bewaersteren met rechter minnen ende mit goeden ghemoede beruspen eenweruen anderweruen ende derdeweruen ende bidden hoir god om haers selfs [zalicheit] [ende] om eer des huus te behouden dat si sulke broke of laet daer si sculdich jn gheuonden js ende en beters si hoir dan niet so sellent sijt [den] Commelduer ende den ghasthuus meesters die dan [te] tide siin an brenghen ende die sellen die persoen rechteuoirt buten yements wederzegghen vten huse voirseit doen ende die persoen nemmermeer weder jnden huse te comen mitter wone ten si dat si hoir also rackelic ghebetert hebbe dat sijs billics waerdich si Jtem waer dat zake dat yemant den huse renten ghelt of enigherande goit bespraec in testament of ghaue jn aelmisse dat sellen die twie bewaersteren bezighen inden ghemienen orbaer bi consent ende goitdencken des Commelduers ende der ghasthuus meesters die dan te tide siin Jtem so wanneer die Commelduer ende die ghasthuus meesters voirseit of diet namaels wesen sullen enich persoen jnden huse voirnoemd ontfanghen zellen so sellen si haer dese ordinancie lesen of doen lesen op dat si weten moghe hoe ende jn wat manieren dat si hoir jnden huse [hebben] sel Jtem [so] wanneer dat die Commelduer ende die ghasthuus meesters voirseit of namaels wesen sullen een beter ordinancie [vinden] [dair] die eer goods jn [vermeerret] mach sijn ende vrede eendrachtticheit ende heylich leuen der persoenen die inden huse voirnoemd wonen mede gheuordert si So moghen si dese ordinancie bi consent ende goitdenken van ons een deels iof altemael na dattet hem der [eren] goods ende den ghemenen orbaer best denct dienen virmaken ende viranderen
</main>
<end>
Jn [kennesse] der waerheyt So hebben wi Scout Scepene ende Rade der stede van leyden voirscreuen desen brief bezeghelt mit onser stede [zeghel] van leyden [jnt] jair ons heren duysent driehondert drieendetneghentich Des manendaechs na [Sente] [louwerijs] Dach
</end>