Compilatiecorpus Historisch Nederlands 1.0 (CHN): ambtelijke teksten 1250-1800: leiden_1414_1

<begin>
</begin>
<main>
1. Item alle dieghene die dit naiste jair binnen Leyden poorter ghewest hebben off die binnen desen naiste jaer binnen Leyden ghewoent hebben ende buten Leyden ghetoghen siin mit horen woenstat binnen twie milen na Leyden off noch buten trecken sellen mit horen woenstat binnen twie milen voirscr ende 1 aldair Scotse velle off enighe ander velle off wolle die toten Engelsken stapel niet en behoirt ofsteken off reden willen die sellen binnen derselver maent als sy uuttrecken weder incomen alinc mit horen woenstat Wie des niet en doet die verboert 25 lb
2. Ende als yement uuter stede vairt in der manieren alse voirscr staet so sal hi der stede gheven van elcken ponde dair hi mede te scote staet een gouden croen eer hi enich goet uuter stede voert bi der boete van 50 lb Dit is oec te verstaen van denghenen die noch butten varen sellen om die neringhe te doen up die pene ende boete voirscr te verboeren
3. Item wie binnen Leyden woent ende enighe comenscip delinghe bottynghe tsy van laken off van wolle heeft off namels creghe in der neringhe van den Scotsken vellen off vellen off wolle diergheliken mitten ghenen die dieselve neringe buten der stede doen alle dinc sonder arghelist die verboert 10 lb Van alle boeten die heer die een helft die burchgrave een virendel ende die stede een vierendeel
</main>
<end>
Anno MCCCCXIIII up Sinte Maertijnsdach
</end>