Compilatiecorpus Historisch Nederlands 1.0 (CHN): ambtelijke teksten 1250-1800: leiden_1416_1

<begin>
</begin>
<main>
Overmids dat die ghesellen van den volambocht in beclachte staen up Claes Roelofss om woerde wille die hi ghesproken soude hebbe die die ghesellen him antrecken dair tgherecht niet anders in en verstaen dan dat Claes Roelofss dairom mistaen soude worde ende om te verhoeden dat mit sulken besceide niement misdaen en worde noch dat sulke opsettynghe niet en ghescien aenghesien dat sulke scarpe hantfesten die wi hebben van onsen heer die staet up lijf ende up goet te verbueren dieghene die opsette of eendrachte maken so heeft tgherecht een zoen offgheraemt ende segghen eendrachtelic een claer zoene twisken den ghemenen ghesellen van den ambocht tsi die hier jeghenwoerdich sien of niet an die een zide ende Claes Roeloffz an die ander zide Des seit tgherecht Claes Roelofsz over dat hi segghen sal den ghemenen ambocht te eren heeft hi enighe woerde ghesproken dat hore eren te na gaet dat hi dair qualiken an gheloghen heeft ende dairup sal hi den ghesellen bidden dat sijt him vergheven willen om Gods wille Voert sel Claes Roelofsz Gode te eren ende den ambocht den siecken malaetsken dairbuten tot hore tymmeryng te help 10000 stiens goet comans goet gheven te leveren twisken dit ende Sinte Jansdaghe te Midzomer naestcomende buten up horen werf ende buten horen cost Ende dese soene biet tgherecht te houden ende te voldoen elc up lijf ende goet
</main>
<end>
tsWoensdaghe na Vastellavont gheseit
</end>