Compilatiecorpus Historisch Nederlands 1.0 (CHN): ambtelijke teksten 1250-1800: leiden_1435_1

<begin>
Wy Aelbrecht Dirxz Reyner Tyelmansz Jan Bollairt ende Huge Aerntsz up dese tijt gesworen van den volambocht te Leyden doe condt allen luyden
</begin>
<main>
also die goede luyden van de gerechte van Leyden by onsen vervolch ons een redelic loon toegeset hebben voir onsen arbeyt dair wy se van ons ende ons ambochts wegen voirs seer of bedancken gelijc der stede brieff ons dairof gegeven uutwijst ende begrijpt soe ist dat wy der goeder stede van Leyden als gemachticht van den gemeenen volres wegen van Leyden die ons dat gebeden hebben voir hem te loven geloift hebben ende geloven dat wy noch gheen volres up desen tijt binnen Leyden werkende ende dat volambocht doen of die namails binnen Leyden comen zullen om dat volambocht te doen tot ghenen dagen vergaderinge rebellicheyt noch uutgange maken en zullen dat der stede van Leyden ende der draperie aldair in eniger wijs tegendragen mach Ende wairt dat wy of yement van den volres voirs enige vergaderinge rebellicheit of uutgange maecten die contrary wair der stede ende der draperie van Leyden dat soude tgerecht corrigieren an denghenen die sy in der sake voirs brueckich vinden souden nae hoere goetdencken boven den boete die dairtoe staen Ende die alsoe enen uutganck gemaict hadden 4 die en souden after die tijt dat ambocht van der volrie doen noch hantieren mogen nergent in ghenen landen dair sy quamen Ende wairt dattet tgherecht bevonde dat yement der stede last dede in desen saken voirscr dat sellen sy an des misdadigen lijf ende goeden rechten nae hoere besceydenheyt naedat sy die brueken vinden sellen ende die en zellen wy van ons ambochts wegen voirs niet verantwoirden noch 1 bystandicheyt doen mar wy sellen den misdadigen altois hinderlic wesen in horen ambocht dair wy connen ende mogen
</main>
<end>
Ende want wy 2 dese punten vast gestade ende onverbroken van ons gemeens ambochts wegen voirs geloift hebben te houden soe hebben wy mitten gemenen ambocht van meesters ende knechten up dese tijt binnen Leyden wesende geweest 3 voir der stede huys te Leyden ende aldair gestaefts eeds gesworen alle dese voirs punten te houden ende te voldoen voir ons ende voir denghenen die nae ons te Leyden in den ambocht voirs comen zullen ende hebben des te oirconde ons ghemeens ambochtssegel an desen brieff gehangen Gegeven int jair ons Heren MCCCCXXXV upten XVIIIden dach in Februario
</end>