Compilatiecorpus Historisch Nederlands 1.0 (CHN): ambtelijke teksten 1250-1800: leiden_1435_2

<begin>
Scout scepene ende rade der stede van Leyden doen condt allen luyden
</begin>
<main>
dat wy mit die wairdeyns mit die vier gesworen van den volambocht mit achte meesters ende mit achte knechten van denselven ambocht voirs gesproken hebben van sonderlinger twist ende scheel die die meesters ende knechten van den volambocht voirscr onder malkander gehadt hebben dair wy mitten voirseyden personen of overdragen ende gesproken hebben by goetdencken van den meesten ommeseggen van den ambochte voirs alsoe wy mitten voirseyde personen gevonden hebben van den meesters ende van den knechten van den ambochte voirs tien man tegens een die wel ghenuege mit sulker dadinge ende uutsprake als wy mitten voirs hierof uutgesproken hebben dat is te weten dat die meesters van den ambochte voirscr hebben sullen van den gouden Eng nobel van vijftalven Engels off payment dier wairde die geset is tot vier voirwollen halve lakenen makens acht ende twintich groot ende die twie knapen elcx twie ende dertich groot den nobel gerekent voir twie ende tnegentich groot ende desgelijcx sullen die knapen hebben van allen puycken of grove laken na den lope van den voirhalve lakenen
Item voirt soe en sellen die meesters hoir knapen winters noch somers voir hoir loen gheen betalinge doen dan mit gelde ende sy en sullen hem voir hoir loen niet myn geven dan voirs is uptie boeten van 18 sc dairof sel hebben die heer deen helft die stede een vierendeel ende die gesworen van den ambocht voirs een vierendeel
Item soe en sel gheen meester enige knechten dit ambocht voirs leren die knaep en sel geven enen halven gouden Eng nobel off payment dier wairde ende niet meer ende dat sel wesen tot des ghemeens ambochts behoif tot hulpe horen bloken ende kairsen ende tot horen armen behoif 1
Item soe hebben wy mitten voirs alle dese voirs punten uutgesproken als voirs is behoudelic den volres hoir brieff die sy van der stede hebben van horen loon volcomelic in hore macht te bliven
Ende wairt dat yement den anderen om deser sake wille mysdede tsy mit woirden of mit wercken dat soud men an dien misdadigen corrigieren by den meesten ommeseggen van den gerechte sonder yement des te verdregen
</main>
<end>
In kennesse der wairheyt soe hebben [wy] onser stede segele an desen brieff gehangen Gegeven int jair ons Heren MCCCCXXXV upten seventiensten dach in Maerte
</end>