Compilatiecorpus Historisch Nederlands 1.0 (CHN): ambtelijke teksten 1250-1800: leiden_1435_4

<begin>
</begin>
<main>
Item hoewel dat voirtijts veel verhoets gedaen is geweest in der draperyen mit scarpen kueren mit scarpen verboden mit scarper correxien so sijn nochtans Willem Danelz ende Katrijn sijn wijf bevonden mit enen onnutte laken dair groete scalkernye in geschiet is des tgherecht van nyement lyden en willen sy en willen dat corrigieren gelijc die kuer dat uutwijst om dese onnutscip ende scalkernye in der draperyen te verhoeden so sel dat laken verbuert wesen ende dairtoe 10 lb also die kuer dat begrepen heeft ende sy en sellen niet drapenieren noch ploten binnen desen naesten 10 jaren ende dairtoe sellen sy doen verwercken dairt him van den poortmeesters gewijst sel worden 25000 stiens twisken dit ende Sinte Jacopsdage naestcomende Ende dit sellen sy borgen huden binnen sdages tsonnenschijn up hore beider lijf ende goet
Item also onlancx geleden Willem Danelsz ende Katrijn sijn wijf mit enen onnutten laken bevonden sijn ende Katrijn doe ter tijt seide dattet hoir laetste wolle was ende vergaderynge van hore solre was ende seide dat si anders niet te sinne en hadde dan hoir kinder mede te vercleden dair si niet wair an geseit en heeft als wel schijnt want si noch nu ter tijt mit enen anderen quaden onnutten laken bevonden is dat bi den gerecht bi den wairdeins ende bi der drapery onnut bekent is so hebben Willem ende Katrijn voirscr dairan verbuert na inhout der cuer te weten 10 lb den here 10 jair niet te drapenieren noch te ploten een derdendel van den laken verbaernt te wesen ende hiertoe sellen si doen verwercken dairt him gewijst sel worden van den poortmeesters 12000 stiens twisken dit ende Sinte Jacopsdage naestcomende op hore beider lijf ende goet Ende dit sel si verborgen huden binnen des dages sonneschijn
</main>
<end>
Gedaen opten XIsten dach in Junio anno XXXV
</end>