Compilatiecorpus Historisch Nederlands 1.0 (CHN): ambtelijke teksten 1250-1800: leiden_1436_1

<begin>
</begin>
<main>
Item overmids dat Claes Paeds den waerdeyns in hoire waerderinge die sy an sijn laken ghedaen hadden wederom ghehaelt heeft tot sinen laken ende seyde toten waerdeyns wat sal ic mit mijn laken doen doocht niet steectet doir den buyck God gheve dat laken dat vallend evel dese woirden hebben die waerdeyns den gherecht anghebrocht dat Claes die gheseyt heeft ende anders gheen quade woirden Ende omdat Claes voirduchtede dat die waerdeyns dese voirscr woirden an him ghetoghen mochten hebben so heeft Claes voirscr desselven dages eer zy die woirden den gherecht anbrochten om immer den wairdeins te voldoen so hy die woirde op die wairdeyns niet ghesproken en hadde ghebeden om verghiffenesse Ende want Claes voirscr der stede dienre is ende men den wairdeyns van nyement misdaen en wil hebben mit woirden noch wit werken so sel Claes voirs min voirdeels hebben dan of hie der stede nyet en diende ende hi sel den gherechte bidden dat sy him dese voirscr woirden vergheven willen om Gods willen
</main>
<end>
</end>