Compilatiecorpus Historisch Nederlands 1.0 (CHN): ambtelijke teksten 1250-1800: leiden_1437_1

<begin>
</begin>
<main>
1. Anthonijs dynctael is jegen Pieter Ghijsbrechtz also Anthonijs claecht op Pieter Ghijsbrechtz ende Jan van Zijl om 5 lb groot ende 12 scelling groot Vlaems gelts alse van brezelyhout dair Pieter Ghijsbrechtz voir den gerechte him selven bekent heeft coopman of te wesen dat Anthonijs hoept dattet scepen kenlic wesen sel ende op dit beken Jan van Zijl dat recht verdregen is Ende also dit beken in der vierscaer voir scepen gesciet is so seit Anthonijs dat hi sijn clage op Pieter Ghijsbrechtz ghewonnen heeft ende dat Pieter voirscr hierof tot sijnre onscou niet comen en sel
2. Pieter Ghijsbrechtz dynctael 1 is jeghen Anthonijs ende seit dat hi des gelts onsculdich is des gelts dair Anthonijs him om beclaecht ende seit dat hi dair vri ende quijt of wesen sel na den recht van der stede also Pieter voirscr jeghen Anthonijs voirscr gecoft noch vercoft en heeft Noch seyt Pieter voirscr so wes comanscip of sculde die hi heeft gehadt die is geschiet jegens Jelijs Bonijn ende jegens Anthonijs niet ende die comanscip die Pieter voirscr jeghen Gillijs voirscr gehadt heeft dair deelde Dirc van der Goude mede in ende Dirc voirscr gebrac op die tijt an Gillijs Bonijn 2 lb groot dair hi Gillijs voirscr selfs hant of heeft bezegelt Ende Dirc van der Goude is sijn brief ouder dan den brief is dair Anthonijs recht mede sprec ende wairt dat zake dat Anthonijs brief ouder wair alst niet en is so seit noch Pieter voirscr dat men nyement en mach machtich maken onverwonnen sculde in te winnen mit recht men en sel se eerst ingewonnen hebben mit recht of mit vonnesse of eerst voir die vierscaer verlijt wesen so soude men nochtans dat voir scepen overgheven dengenen die men dat machtich maken soude na der stede recht van Leyden so en soudet anders van geenre wairde wesen Bi allen desen voirscr punten so seit Pieter also Anthonijs voirscr scepen noch scepenebrieve en heeft op Pieter voirscr dat hi tot sijnre onscou comen sel
3. Aldus so wysen scepene also Anthonijs gheclaecht heeft op Pieter Ghijsbrechtz om 5 lb en 12 scelling groot Vlaems gelts van brezelihout ende Pieter Ghijsbrechtz him selven coopman bekent heeft van den brizelyhout voir den gerecht voir die vierscaer so sel Pieter voirscr Anthonijs voirscr betalynghe doen van der somma gelts voirscr ende heeft Pieter voirder dat brizelyhout overghegheven dat sel Pieter selve vervolghen mitten recht opten genen dien hi dat hout overghegheven heeft ende geven Anthonijs die kennynghe ghewonnen ende Pieter verloren
</main>
<end>
</end>