Compilatiecorpus Historisch Nederlands 1.0 (CHN): ambtelijke teksten 1250-1800: leiden_1437_2

<begin>
</begin>
<main>
Dirc Claesz dynctael is jegens Katrijn Pieter Goezotsz of horen rechten voicht ende seit dat Katrijn voirscr mit horen voicht sculdich sijn in Claes Pietersz buel te brenghen eerst 37 1/2 scilde alse van comanscip van wollengaeren [enz] item noch 100 ende 10 pont wolle voir elc pont 4 groot die Katrijn gecoft heeft item noch 250 velle voir elc 100 9 noblen die oic Katrijn gecoft heeft jeghen Claes Pieters van welke drie punten voirscr Hughe van der Hant goeden tuuch gehoirt heeft dat dit wair is ende dese sculde heeft Claes Pietersz selve in sijn sculdebueck gescreven ende Katrijn voirscr maent mit desen selven bueck Claes voirs sculde ende buert dairof op dat dairin bescreven staet So seit Dirc Claesz dat Katrijn voirscr mit horen voicht dese voirscr sculde inbrenghen sel in den buel voirs Voirt so seit Dirc voirscr also Katrijn voirscr mit horen rechten voicht geen verjaert poorteren en sijn dat dese zake staen sel totter scepen prove ende niet tot hore onscou ende Dirc Claesz begeert dat men dat sculdebueck besien wil
</main>
<end>
</end>