Compilatiecorpus Historisch Nederlands 1.0 (CHN): ambtelijke teksten 1250-1800: leiden_1439_1

<begin>
</begin>
<main>
1. Item overmits informatie die Griete Engels dochter gedaen heeft eenre jonger gheheten Meynse die up dese tijt woenachtich is tot Jan Heermansz dat sy horen meester wolle ontnemen soude ende soud se hoir brengen ende want wy ter wairheit bevonden hebben dat dese Jan Heermansz maicht voirscr Griet voirscr by hore informacie gebrocht heeft omtrent 14 lb wolle ende want by dustanygher diefferie veel van den trapenieres by desen verderft mochten worden dattet gherecht ymmer niet en staet te lyden hierop ist tgerecht overdragen dat dese Griet voirs enen ygeliken totten exempel leggen sel opter stede huys in den veynster by den scout mit een vlies wolle om den hals durende al so lange als hoir sentencie duert ende dairtoe sel sy huyden binnen sdages sonneschijn uter stede van Leyden gaen ende morgen binnen sdages sonneschijn uut Rijnlant uut Hage ende uut Hagheambocht op hoir lijf ende sel dairuut bliven 10 jair lanc op hoir lijf
2. Item om overmids dat Meyns Jan Hermansz maecht horen meester sijn wolle ontstolen heeft ende heeft die Griete voirscr vercooft datten gerecht van nyement en staet te lyden hiervoir sel dese Meyns voirscr also sy onnosel ende slecht is huyden binnen sdages sonneschijn uter stede van Leyden gaen ende morgen uter bailjuscap van Rijnlant uut Hage ende uut Hageamhocht op hoir lijf ende sal dairuut bliven vijf jair lanc op hoir lijf
</main>
<end>
</end>