Compilatiecorpus Historisch Nederlands 1.0 (CHN): ambtelijke teksten 1250-1800: leiden_1439_2

<begin>
</begin>
<main>
Item also Foeytgen Gerijt Scutemakersz gesproken heeft uptie wairderinge van der wairdeyns van den vellen die Jan van Veen mit synen gesellen lest te Leyden gebrocht hebben ende heeft geseit hadde hy of een ander die vellen te Leyden gebrocht 3 die wairdeyns soud se uutgewijst hebben oic so heeft Foeytgen afterbaex geseyt dat Kense ende Hulse vellen sijn soude dair hy in betuucht is ende wantet gerecht van Foeytgen voirscr noch van nyement anders en staet te lyden enige afterspraeck optie wairdeyns te spreken van enigher wairderinge die sy wairderen na horen vijf synnen so sal Foeytgen voirscr doen verwerken an der stede vesten 10000 stiens dit sal Foeytgen voirscr verborgen huyden binnen sdages sonneschijn ende en verborchde hy des niet so sal hy morgen binnen sdages sonneschijn uter stede van Leyden gaen uut Rijnlant Hage ende uut Hageambocht up sijn lijf ter tijt toe dat die stien verwrocht is
</main>
<end>
</end>