Compilatiecorpus Historisch Nederlands 1.0 (CHN): ambtelijke teksten 1250-1800: leiden_1462_1

<begin>
</begin>
<main>
1. Jan van Zwieten als scout van Leyden is sijn dingtail tegens Willem Foeytgen van Zijl ende tegens Willem Jacopsz ende Jan van Zwieten voirs die seit dat hy den voirs personen mit recht anseyt dat sy een overdracht ende een eennicheyt gemaict hebben tegens die kueren ende rechten van der stede ende seit redenen wairby want het den gerechte ende wairdeyns kenlic is dat sy op enen dach ende op een tijt allegader hoir verwen gelaten hebben ende dit is wair dat dat niet wesen en mochte sonder mit een te spreken ende dairuut een overdrachte mit malkander gemaict ende dat noch meer is sy hebben gekent allegader voir den gerechte dat sy voir dat loen niet verwen en wouden sy en wouden meer hebben ende also vroech als men hem meer consenteerde te hebben soe hebben sy terstont weder beghinnen te verwen Ende hadde dat sake geweest dat men hem niet meer en hadde willen consenteren sy en souden niet hebben willen verwen ende by dese redenen soe blijctet clair dattet een overdrachte is ende of sy seggen willen dat hoere enich hebben geweest by den wairdeyns ende hem geseit dat sy voir dat loen niet verwen en wouden dat seit Jan van Zwieten dat hem dat mede gaet want dat was een teyken dat sy mit malkander dat een gesproken hebben ende mit malkander gesproken gesloten ende overdragen waeren dat sy niet meer verwen en wouden mer om hem te onsculdigen soe hadden sy gelijc sculdich geweest te comen by den gerechte ende wairdeyns ende hadden hem te kennen gegeven hoe dat alle gereescap van der verwerie costeliken wair ende dat men dairin voirsien woude eerdat sy die overdrachte maicten hoir verwen te laten ende sy hebben allegader gelijc hoir verwen gelaten eerdat sy yement dairof te kennen gegeven hebben Ende by dese redenen soe blijctet ende is wair dattet een overdracht gemaict is van himluyden ende dit is den gerechte ende wairdeyns ende die draperie wel kenliken dattet aldus geschiet is ende dairom seit Jan van Zwieten dat hy zijn vermeten mitten gerechte ende wairdeyns voirs wel betuycht heeft dat hy hem vermet
2. Willem Foeytgen van Zijl ende Willem Jacopsz is hoir dingtail tegen Jan van Zwieten als scout van Leyden ende Willem voirs die seyt dat hy van den eysch ende aensprake sel wesen vry ende quijt die Jan van Zwieten voirs op Willem voirn gedaen heeft reden wairby en wairomme want Jan van Zwieten voirs als scout Willem voirn niet betuycht en heeft by staende vierschair als recht is datgeen dat hy hem angeseit heeft Ende Willem voirs die seit alse Jan van Zwieten als scout mijns heren boeten winnen moet mit tugen dat scepen kennen dat tugen van wairden zijn ende Jan van Zwieten als scout dat niet betuycht en heeft alse recht is voir scepenen soe seit Willem voirn dat hy van der aensprake ende eysch sel wesen vry ende quijt na den recht van der stede ende na inhout der kuer ende begeert hierof een vonnisse van scepenen ende eerst dairop gehoirt te wesen
</main>
<end>
</end>