Compilatiecorpus Historisch Nederlands 1.0 (CHN): ambtelijke teksten 1250-1800: leiden_1462_3

<begin>
</begin>
<main>
Alsoe Jan Clais Deyenz op die Hoeygraft een zwart an den ramen gehadt heeft dat by den wairdeyns gewairdeert was een clien loot ende by versumenheyt van den wairdeynsknecht tvoirs laken bezegelt wort welc segel omgespelt wort ende dat scrift uutgedaen omdat mens niet sien en soude dattet gesegelt was twelc dat is een grote schalkernye ende contrarie der kuere van der draperye hiervoir sel Jan voirs mit zijn wijf ende joncwijf die doe ter tijt mit hem woende zijn meester volre mit zijn knechten die tvoirs laken gevolt ende angeslegen hebben samentlic comen voir den gerechte in der stede huys in der vierschair als die scout ende scepenen te rechte sitten ende elc ten heyligen zweren dat zy dat zegel van den laken niet ommegespelt noch tscrift van den laken niet ofgedaen en hebben noch doen doen noch nyement en weten diet gedaen heeft ende hem elc soe zuveren mit horen eede Soe wie van hemluyden dair niet voir zweren noch hemselven dairof en zuvert die sel dairvoir een bedevairt doen tot Onser Liever Vrouwen ten Louwen opten Berch ende sel der stede van der voirs bedevairt een goet betoich senden eerdat hy weder binnen der stede van Leyden in der bailiuscip van Rijnlant in den Hage of in Hageambocht comen sel op die verbuernisse van zijn rechterhant
</main>
<end>
</end>