Compilatiecorpus Historisch Nederlands 1.0 (CHN): ambtelijke teksten 1250-1800: leiden_1463_1

<begin>
</begin>
<main>
Pouwels Reynersz is sijn dingtail tegen Florijs van Zijl ende Pouwels voirs seyt dat hem Florijs voirscr mit onrecht gepant heeft ende hy dat mit recht geweert heeft na den recht van der stede en seyt redene wairby dats te weten dat men nyement panden en mach dan mit scepene of mit scepenebrieve off huyshuyer lanthuyer of molenhuyer binnen jairs verschenen ende soe Florijs voirs gepant heeft an sijn huys om sestien halve lakenen die hem Symon voirs bekent soude hebben in gescrifte dairop seit Pouwels voirs dat die pande van gheenre wairden en is want Florijs voirs niet bewysen noch bewaeriden en sell dat Florijs voirs in Symons Aerntsz huys sijn lakenen die Florijs voirs mit sijns selfs merck ende nopteyken gedrapeniert heeft te uutreden gebrocht heeft dair Symon voirs een kerfstock of hebben soude ende die voirs Florijs een wederstock alst na den rechte gewoente ende costume van der uutrederie ende na der kuere van der uutrederie behoirt te wesen ende te geschien ende en mach Florijs voirs dat niet bewysen dan soe seit Pouwels voirs dat hy vry ende quijt wesen sel van der pandinge Voirt seyt Pouwels voirs dattet recht van der stede is soe wie den anderen pandet sel nomen somme van pennynge voir hoeveel dat hy pandet om die pandinge dairna te scatten ende want Florijs voirs geen somme van pennynge genoemt noch geroert en heeft hoe lage of hoe hoge dat hy gepant heeft dat hy dairomme mit onrecht gepant heeft ende dat die pandinge van gheenre wairden en is noch wesen en sel Ende Pouwels voirs seyt mede dat hy by den voirs redenen vry ende quijt sel wesen van der voirs pandinge na den recht van der stede ende begeert des een vonnisse van scepenen ende voirt hierop gehoirt te wesen
</main>
<end>
</end>