Compilatiecorpus Historisch Nederlands 1.0 (CHN): ambtelijke teksten 1250-1800: leiden_1463_2

<begin>
</begin>
<main>
Alsoe wel bekuert staet dat soe wie om velle of om wolle varen willen te coopen die men hiet varkens die sullen hoir deelinge leggen onder den wairdeyns mit denghenen die mit hem deelen sullen bezegelt eerdat zy uter stede varen [enz] ende die velle ende wolle sullen zy binnen Leyden brengen ende zy ende hoir mededeelres in der deelinge overgegeven sullen die velle ende wolle zelve drapenieren soe dieselve kuer inhout ende want Andries Huge Andrieszz uutgevaren is sonder deelinge thuys te laten als hy sculdich was te doen nae inhout der kuere ende dat meer is soe is mitter wairheyt bevonden by goeden wairachtigen personen dat zy ter Vere teegens enen coopman van Nucasteel uut Engelant gehieten Thomas Kertloe gecoft hebben een deel wolle ende sonderlinge een sack wolle ende dat Andries Hugenz voirs dairof toebehoirde die een helfte van den voirscr sack wolle ende coften die by Casteelsche marcken ende hebben die wolle gebrocht binnen der stede van Rotterdam ende die weder vercoft den poorteren van Leyden alsoe dat Andries voirs nae inhout der voirs kuere zijn wolle die hem toebehoirde binnen Leyden niet gebrocht en heeft als hy sculdich was te doen nae inhout der kuere dan heeft die onder dexel van anderen coopluyden doen vercoopen in schyne of hy paert noch deel an die voirs wollen en hadde gehadt ende dat veel quader is soe heeft hy als men mitter wairheyt bevint dese comanscip van den voirs wolle mit poorteren van Rotterdam gedaen by Casteelsche marcken dairby dat men in der comanscip van den vellen ende wollen die sijn van sulken landen wairden ende prise als dair men Leydsche lakenen sculdich is of te reden ende oic maken moet niet gewoenliken en is te coopslagen noch comanscip te doen by denwelken genoich blijct dat die wolle van sulke lande wairde ende prise niet en was als zy na den kueren van der stede sculdich behoirde te wesen mar van soe argen lande ende van soe clienen prise dat die poorteren hem dairmede niet schuldich en zijn te behelpen in der neringe van der draperye ende in der hantieringe van der comanscip van den vellen ende wollen na den kueren van der stede Ende overmits dat dese hantieringe die Andries voirs in der comanscip van den wollen gedaen heeft is contrarie den kueren van der stede ende der draperie ende dragen souden int eynde tot groten qualicvaren ende verderffnisse van der voirs neringe die wel gescepen wair dairby verderft te worden ende te niet te gaen dairop dat men sculdich is sonderlinge toge te hebben ende dat dustanige saken verhoet worden datten die poorteren ende inwonende hem niet mede en behelpen mit sulke comanscip soe sel Andries voirscr hiervoir doen verwercken an der stede vesten vijftich duysent stiens
Hierof die scout die helft
</main>
<end>
</end>