Compilatiecorpus Historisch Nederlands 1.0 (CHN): ambtelijke teksten 1250-1800: leiden_1467_1

<begin>
</begin>
<main>
Pieter Gerijtsz die verwer is zijn dinctael tiegens Huge Jacopsz die verwer zijn gehuerde knecht ende Pieter voirs die seyt dat Huge voirn tot gheenre onsculde comen en sel van dair hy hem om beclaecht reden waerby ende wairomme want Huge voirs Pieter voirn zijn gehuyerde knecht is ende geweest heeft van Sinte Martijnsdage in den winter anno LXI tot nu toe ende die huyer altijt geduert heeft van jair te jair tot Sinte Martijnsdage in den winter ende sy by malkander alsoe van jair te jair tot Sinte Martijnsdage in den winter gebleven zijn dus seyt Pieter voirs dat Huge voirn sculdich is voirt te gaen zijn jairschair uut te dienen gelikerwijs als hy die anderen jaeren gedaen ende gedient heeft ende gelikerwijs als andere knechten gedient hebben ende noch dienen off 20 Rijns gulden dairvoir te geven Ende Pieter voirscr die seyt dat dit reden ende recht is ende begeert hierof een vonnesse van scepenen ende eerst hierup gehoirt te wesen
2. Huge Jacopsz die verwer is zijn dinctael tiegens Pieter Gerijtsz ende Huge voirscr die seyt onschoude van die gelden ende van sulke voirwairden dair hem Pieter voirs om beclaecht reden wairby ende wairomme want Huge voirs Pieter voirn niet gelooft en heeft dair hy zynen eedt toe doen wil als recht is ende seyt dat hy van der eyssch ende aensprake comen ende staen sal tot sijnre onsculde na den rechte van der stede ende oic nae inhout der kuere alsoe als Pieter voirs scepene noch scepenebrieven op Huge voirn sprekende en heeft ende begeert hieroff een vonnesse van scepenen
</main>
<end>
</end>