Compilatiecorpus Historisch Nederlands 1.0 (CHN): ambtelijke teksten 1250-1800: leiden_1485_1

<begin>
</begin>
<main>
Alsoe die printers van der weverye onder den touwen ghecomen zijn ten huyse van Kersse Jan Hoenszz om te printen ende als zy dair waren soe heeft Kersse voirscr die voirn printers wechghewesen segghende dat men dair niet en dede dairna omtrent den tijt van twie off drie daghen soe sijn die printers noch dair wedergecomen ende als si dair quamen heeft Kersse voirs denselven printers noch weder wechgewesen seggende dat men dair niet en dede ende overmits dat die voirs printers twijffelden ende presumpcie hadden dattet anders was soe sijn sy des anderen dages sochtens weder gegaen ten huyse van Kersse voirs ende sijn after ghegaen int weefhuys ende hebben bevonden daer sitten wevende twie gesellen op een onghelijck blaeu ende besagen dat werck vorder so bevonden zy datter een wederstick offghesneden was dairnae die printers vrageden wair dat halve laken ghebleven wair ende wat hy mit dat halve laken dat men sat ende wevede doen soude dairop Kersse voirs antwoirde dat hy dat als een zwartte dairoff soude maken ende hebben vorder bevonden dat die voirs Kersse had in der volrye een halff laken dat niet gheprintet en was van den printers opten touwe alst behoirt twelke een quade ende onbehoirlike sake is van scalkernye in der draperye hiervoir sel Kersse Jan Hoensz voirs doen verwerken an der stede vesten 20000 stiens
</main>
<end>
</end>