Compilatiecorpus Historisch Nederlands 1.0 (CHN): ambtelijke teksten 1250-1800: leiden_1485_2

<begin>
</begin>
<main>
1. Adriaen van Zwieten scout tot Leyden ende rechter van mijns genadigen heren wegen is zijn dingtail tegens Gerijt Kerstantz verwer ende die rechter seyt dat hy Gerijt voirn terecht na den kueren ende statuten van der stede gedaicht verclaicht ende angesproken heeft ende dat hem Gerijt voirn mit onrecht verweert heeft ende seyt die reden wairomme alsoe mijn genadige here als prince van den lande die stede van Leyden zekere previlegiën ende macht gegeven heeft alsdat die scout mitten achte scepenen zekere kueren ende statuten maken mogen diewelke van wairden wesen ende men onderhouden sel gelijck die hantvest uutwijst nu is wair dat Gerijt Kerstantz mitten anderen verwers binnen Leyden contrarie die kueren ende statuten mit malkanderen binnen tsjaers een overdracht gemaict hebben in sulken schyne dat onlancx enige van den verwers mit hem gelijc in der sake wesende voir den wairdeyns geweest zijn ende hebben sonder wete van den gemenen recht uut hoir alre name geseyt dat zy niet meer verwen en wilden dan enen sekeren tijt of men soude hoir loen hoger verbeteren ende lieten dairop elc hoir neringe van der verwerye te doen alle tesamen op enen dach gelijck scepenen van Leyden kenlijck is ende dit alsoe geschiet wesende die rechter hem overtugen sel mit goeden wittachtigen tugen want dair wel bekuert staet in der stede kuerboick dat nyemant tsy man of wijf poorter of gheen binnen Leyden enige overdracht maken sal dan by consent van den gemenen recht twelke hy in deser sake niet gedaen heeft ende die rechter na den kuere ende statuten van der stede dagelicx alle sijn broicken alle jair winnen mach mit tugen ende dit binnen tsjairs is dat Gerijt voirs dairan verbuert heeft na inhout der kuere Voort soe seyt die rechter alsoe Gerijt voirs boven desen noch een overdracht mitten verwers gemaict heeft boven die kuere in deser manieren soe wat drapenyere dagelicx in enige verwerye binnen Leyden pennyngen sculdich is ende in sijn als andere verwerye begeert te verwen dat hy die niet verwen en sel willen noch gedaen heeft tenzy dat diegeen dair hy van gegaen is die eerst voldaen ende betailt sel hebben alsoe die rechter hem dat overtugen sal mit wittachtigen tugen ende soe dat mede tegen die kueren ende statuten van der stede is ende die rechter sijn boeten ende broicken winnen mach na inhout der kuere mit tugen dat Gerijt voirs dairan verbuert heeft na inhout der kuere Voort seyt die rechter alsoe dagelicx gebuert soe wanneer enich poorter enich verwer 1 binnen Leiden sculdich is ende alsdan sijn lakenen brenct die verwer die hy sculdich is van verwen dat die die lakenen houden mit hoir selfs belieft voir den eyssche die zy eysschen ende al buyten consent van den scout ende rechter die sculdich wair den eysscher ende verwere recht te doen ende sonder dat die eysscher recht sprect upten lakenen of anvanck ende antastinge dairan doet na den recht van der stede welke sake scepenen kenlijck is ende alsoe nyement na den recht van der stede ende na allen recht sculdich is hemselven te rechten buyten den rechter dat hy dat den rechteren beteren sel by den scepenen van Leyden of dat hy den rechter dairvoir geven sal 60 tsheren ponden Ende of Gerijt voirs seggen woude dat sy van als totter ontscoude comen soude voir hem nemende enige ontsculdige uutwege [enz] dairop antwoirt die rechter alsoe hy heeft scepenkennis van Leyden wittachtige tugen en kueren ende statuten van der stede dat die sake geschiet is als den eysscher eysscht dat hy in sijn recht volstaen sel ende dat hy dairom totter ontscoude niet comen en sel des die scout begeert vonnis ende wijsdom van scepenen ende eerst gehoirt wesende mit sijn tugen ende bescheyt
Actum sVrydages voir Sinte Pieterskermisse anno LXXXV

#...#

<end>
</end>